ადამიანის უფლებების დაცვისა და სამოქალაქო ინტეგრაციის საპარლამენტო კომიტეტის თავმჯდომარე მიიჩნევს, რომ ქალთა მიმართ ძალადობის წინააღმდეგ უფრო მეტი ძალისხმევა პრევენციაზე უნდა იყოს მიმართული. ამასთან, სოფო კილაძე მიესალმება, რომ სიძულვილის მოტივით ადამიანის მკვლელობასა, ან ძალადობაზე ძალიან მკაცრი სასჯელი იყოს.

On.ge-ს კითხვაზე, უნდა იყოს თუ არა ფემიციდი განსაზღვრული ცალკე მუხლად კანონმდებლობაში, კილაძემ ასე უპასუხა:

"სიმართლე გითხრათ, ფაქიზად ვეკიდები კონკრეტულ შემთხვევას. ხშირად, იდეა კარგია, მაგრამ კონკრეტული ჩამოყალიბება მუხლისა, ან რაიმე ფორმით კანონში ჩანაწერისა არ შეესაბამება იმ აზრს ან იმ მიზანს, რა მიზნითაც ის არის შექმნილი, ამიტომ ძალიან ფაქიზად ვეკიდები კონკრეტულ თემებს. ზოგადად, იდეა იმის შესახებ, რომ მნიშვნელოვანია პრევენცია ამ კუთხითაც მოხდეს, რომ სასჯელი იყოს მკაცრი, ამას, რა თქმა უნდა, მივესალმები."

საქართველოს წინა მოწვევის პარლამენტმა სისხლის სამართლის კოდექსში ფემიციდის ცალკე მუხლად განსაზღვრის შესახებ კანონპროექტი ჩააგდო. პროექტს მხარდასაჭერად 50 ხმა სჭირდებოდა და 48 მიიღო. ინიციატივის თავდაპირველი ვერსიის მიხედვით, სისხლის სამართლის კოდექსს უნდა დამატებოდა 1081 მუხლი: ფემიციდი - გენდერული ნიშნით მოტივირებული ქალის განზრახ მკვლელობა.

ფემიციდსა და სხვა საკითხებზე სოფო კილაძის მოსაზრებები სრულად წაიკითხეთ On.ge-ს ინტერვიუში.