შინაგან საქმეთა სამინიტროს მოუწოდებს ყველა პირს, რომელიც 19 წლის ფეხბურთელის გიორგი შაქარაშვილის გარდაცვალების საქმესთან დაკავშირებით რაიმე სახის ინფორმაციას ფლობს, ითანამშრომლოს საგამოძიებო უწყებასთან. ამ თემაზე დღეს შს მინისტრის მოადგილემ ბრიფინგი გამართა.

უწყების ინფორმაციით, 18 ივნისს, საღამოს გიორგი შაქარაშვილი მცხეთის რაიონის სოფელ ნარეკვავის დასახლებაში სტუმრად იმყოფებოდა მეგობრის მიერ ნაქირავებ სახლში, სადაც ცალკეულ პირთა შორის ურთიერთშელაპარაკების ნიადაგზე სიტყვიერი და ფიზიკური დაპირისპირება მოხდა. მათი თქმით, მოგვიანებით კონფლიქტი თბილისი-სენაკი-ლესელიძის საავტომობილო გზაზე გაგრძელდა. გიორგი შაქარაშვილის კვალი მდინარე არაგვის ხიდის სიახლოვეს იკარგება.

"დღეის მდგომარეობით, სისხლის სამართლის საქმეზე გამოკითხულია საქმესთან შემხებლობაში მყოფი ათეულობით პირი, დაახლოებით 50 მოწმე, ჩატარებულია ათეულობით საგამოძიებო მოქმედება, მათ შორის — საცხოვრებელი სახლების ჩხრეკა, ამოღებულია კონფლიქტში მონაწილე და შემსწრე პირთა ტანსაცმელი, ავტომანქანები, მობილური ტელეფონები, აღებულია კვლევის ნიმუშები, დანიშნულია ექსპერტიზები, გამოთხოვილია სათვალთვალო კამერების ჩანაწერები", — წერია შსს-ს განცხადებაში.

უწყების ინფორმაციით, გარდაცვალების მიზეზის დასადგენად მიმდინარეობს სასამართლო-სამედიცინო ექსპერტიზა.

22 ივნისს, 4-დღიანი ძებნის შემდეგ, მყვინთავებმა ფეხბურთელ გიორგი შაქარაშვილის ცხედარი წყალში იპოვეს. საგანგებო სიტუაციების მართვის სამსახურის ინფორმაციით, საძიებო სამუშაოებში ჩართული იყო 70 მეხანძრე-მაშველი, 7 ნავი და ორი სპეციალური კატერი, რომელიც ფსკერის სკანირებას ახორციელებდა.

ოჯახმა უწყებას ფეხბურთელ, გიორგი შაქარაშვილის დაკარგვის შესახებ 19 ივნისს, დაახლოებით 11 საათზე შეატყობინა