ევროპული საქართველოს ერთ-ერთი ლიდერი, დავით ბაქრაძე ამბობს, რომ საკონსტიტუციო ცვლილებების კენჭისყრაში ნაციონალური მოძრაობის მხრიდან მონაწილეობის არ მიღებით მათ მოტივაციაში ეჭვი არ ეპარებათ. ბაქრაძის თქმით, ორივე პარტია იქცევა ისე, როგორც მას მიაჩნია სწორად.

"ნამდვილად ვიცი, რომ ჩვენ ორივეს, აუცილებლად მიგვაჩნია 8 მარტის შეთანხმების შესრულება. დანამდვილებით ვიცი, რომ ნაციონალურ მოძრაობასაც, ისევე როგორც ჩვენ, აწუხებს და უნდა ქვეყანაში პროპორციული საარჩევნო სისტემის შემოღება. მათაც ისევე აწუხებთ გიორგი რურუას ბედი, როგორც ჩვენ. ამიტომ, ამ შემთხვევაში, ორივე პარტია ისე იქცევა, როგორც მას მიაჩნია სწორ და საუკეთესო გამოსავლად. ჩვენ სწორ და საუკეთესო გამოსავლად, ამ ვითარებაში, მიგვაჩნია პირველი მოსმენით კენჭისყრაში მონაწილეობა და ამით იმ სცენარის გამორიცხვა, რომ "ქართული ოცნება" აგდებს პროპორციულ სისტემას. "ნაციონალურმა მოძრაობამ" მიიღო განსხვავებული გადაწყვეტილება, მაგრამ მათ მოტივაციაში ეჭვი არ გვეპარება და შესაბამისად, პატივს ვცემთ მათ გადაწყვეტილებას", — თქვა ბაქრაძემ.

საარჩევნო სისტემის ცვლილებას კენჭს პირველი მოსმენით დღეს უყრიან. ნაციონალური მოძრაობა კენჭისყრაში მონაწილეობას არ მიიღებს, ევროპულმა საქართველომ კი გადაწყვეტილება შეცვალა და 20 ივნისს განაცხადა, რომ კენჭისყრაში მონაწილეობას მიიღებს და ცვლილებებს პირველი მოსმენით მხარს დაუჭერს, რათა ქართულმა ოცნებამ კვლავ არ ჩააგდოს. რაც შეეხება მეორე და მესამე მოსმენას, როგორც პარტიაში ამბობენ, ეს დამოკიდებული იქნება იმაზე, გაათავისუფლებენ თუ არა გიორგი რურუას.