პარლამენტის დამოუკიდებელი დეპუტატი, ბექა ნაცვლიშვილი უმრავლესობის წევრებს მიმართავს, რომ თავს გაუფრთხილდნენ და კვირას, 21 ივნისს საარჩენო სისტემის ცვლილების კენჭისყრა ავადმყოფობის გამო არ გააცდინონ, რადგან მათი ხმები მნიშვნელოვანია.

"ბატონო ანრი, რადგან თქვენ დაადასტურეთ რაოდენობა, 92 ადამიანი, მართლა იმდენად მნიშვნელოვანია ამ კანონის მიღება, თავს გაუფრთხილდით და ვიღაცამ მერე ავადმყოფობა არ მოიმიზეზოს, რომ ამიტომ ვერ მოვედი და ჩავარდა და ა.შ. თავს გაუფრთხილდით მაქსიმალურად, საფრთხეში არ ჩაიგდოთ თავი, არ გაცივდეთ, სწრაფად არ იაროთ... რომ ჯანსაღები და ჯანმრთელები მოხვიდეთ აქ და მხარი დაუჭიროთ", — განაცხადა ნაცვლიშვილმა.

იურიდიულ საკითხთა კომიტეტმა საარჩევნო სისტემის ცვლილებასთან დაკავშირებით საკონსტიტუციო ცვლილებებს მხარი დაუჭირა. ცვლილებების დამტკიცების შემთხვევაში, შემდეგი მოწვევის პარლამენტში 30 დეპუტატს მაჟორიტარულით, ხოლო 120-ს პარტიული, პროპორციული, სიით აირჩევენ.

აღნიშნული კანონპროექტს პირველი მოსმენით კენჭს კვირას, 21 ივნისს ჩანიშნულ სესიაზე უყრიან. იმისათვის, კონსტიტუციაში ცვილებები შევიდეს, მას 113 დეპუტატის მხარდაჭერა სჭირდება.

როგორ ცნობილია, ცვლილებებს მხარს დაუჭერს უმრავლესობის 92 დეპუტატი და ასევე, დამოუკიდებელი დეპუტატები და პატრიოტთა ალიანსის დეპუტატები.

ევროპულ საქართველოსა და ნაციონალურ მოძრაობაში კი აცხადებენ, ისინი მხარს არ დაუჭერენ ცვილელებს, თუ მთავარი არხის მეწილეს, გიორგი რურუას პატიმრობიდან არ გაათავისუფლებენ.

120/30-ზე საარჩევნო სისტემაზე ოპოზიცია და მმართველი გუნდი 8 მარტს, ხანგრძლივი მოლაპარაკებების შემდეგ შეთანხმდნენ. მხარეებს შორის დიპლომატების შუამავლობით მოლაპარაკებები მას შემდეგ დაიწყო, რაც ბიძინა ივანიშვილმა 24 ივნისს გაცემული პირობა არ შეასრულა და ქვეყანა სრულად პროპორციულ სისტემაზე არ გადავიდა.