Dune წლის ერთ-ერთი ყველაზე გახმაურებული პროექტია, რომლის ხილვასაც მაყურებლები განსაკუთრებულად ელოდებიან, თუმცა პრემიერამდე რამდენიმე თვით ადრე ფილმის რეჟისორი, დენის ვილნევი გადასაღებ მოედანზე დაბრუნებასა და დამატებითი კადრების გადაღებას გეგმავს.

გადამღები ჯგუფი აგვისტოში აპირებს, რომ უნგრეთის დედაქალაქ ბუდაპეშტში დაბრუნდეს, სადაც 2019 წელს მიმდინარეობდა გადაღებები. ამის შესახებ ინფორმაცია ფილმის ერთ-ერთმა მსახიობმა, ოსკარ აიზეკმა დაადასტურა:

"დამატებითი გადაღებების საჭიროების გამო, როგორც მითხრეს, აგვისტოში ბუდაპეშტში ვბრუნდებით. მანამდე უკვე გადაღებული კადრების მონტაჟის ნაწილი ვნახე და შთამბეჭდავი იყო. დენის ვილნევი ნამდვილი ხელოვანია და მიხარია, რომ მასთან კვლავ ვითანამშრომლებ. სიგიჟეა, რომ ფილმის გამოსავლამდე რამდენიმე თვით ადრე დამატებითი გადაღებები გვაქვს, მაგრამ მსგავსი რამ Star Wars-ის შემთხვევაშიც მომხდარა", — განაცხადა აიზეკმა.

მიუხედავად იმისა, რომ დიუნის პრემიერა 18 დეკემბერსაა დაგეგმილი, როგორც უცხოურ მედიაში ვრცელდება ინფორმაცია, ეს დაუგეგმავი გადაღებები ფილმის გამოსვლის თარიღის ცვლილებას არ გამოიწვევს.

ფოტო: Warner Bros.

რამდენიმე კვირის წინ გადაღების პროცესზე ფილმის ოპერატორმა, გრეიგ ფრეიზერმა ისაუბრა:

"ამ პროექტზე მუშაობა ვიზუალურ თავგადასავალს ჰგავდა. მთელი ეს პროცესი გასაოცარი გამოცდილება იყო. იმ ადამიანების გამო, რომლებიც ამ ფილმის შექმნაში იღებდნენ მონაწილეობა, უბრალოდ გაოცებული ვიყავი: ზოგიერთი მსახიობი იმასთან ერთად, რომ წარმოუდგენლად ნიჭიერია, ამავდროულად ძალიან სასიამოვნო ადამიანიცაა".

დენის ვილნევი დიუნს ფრენკ ჰერბერტის ამავე სახელწოდების მქონე სამეცნიერო ფანტასტიკის ჟანრის საკულტო წიგნის მიხედვით იღებს და მასში ისეთი ცნობილი სახეები მონაწილეობენ, როგორებიც არიან ტიმოთი შალამე, ზენდეია, ხავიერ ბარდემი, ჯეისონ მომოა და ოსკარ აიზეკი.

ასევე იხილეთ: