ლარის კურსი დოლართან მიმართებით ბოლო რამდენიმე დღესა და თვეში კი არა, საათში გაუარესდა.

აი, მაგალითად, ამ გიფში ჩანს, თუ როგორ აიწია დოლარის ფასმა პირდაპირ ეთერში:

საშველი ჯერჯერობით არსაიდან ჩანს და ამიტომ გადავწყვიტე, გული იმით მაინც დაგიმშვიდოთ, რომ უარესიც შეიძლება მომხდარიყო. რამდენიმე ქვეყანაში ჩვენი ძალიან შურთ და ალბათ არც ესმით, რა გვაწუწუნებს.

წარმოგიდგენთ 10 უცხოურ ვალუტას, რომელიც ლარზე უარეს დღეშია.

1. ზიმბაბვეური დოლარი

ზიმბაბვეური დოლარი აღარ არსებობს, მაგრამ იმდენად, რამდენადაც ის მოკვდა - ამ სიტყვის პირდაპირი მნიშვნელობით, შეგვიძლია ჩავთვალოთ, რომ ლარზე უარეს დღეშია. ეს ვალუტა ბრუნვიდან 2009 წელს ამოიღეს. ამჟამად ზიმბაბვეში აშშ დოლარი, სამხრეთაფრიკული რანდი და ბოტსვანური პულა ბრუნავს.

ასე გამოიყურებოდა ზიმბაბვეური დოლარი სიკვდილამდე:

ფოტო: Reserve Bank of Zimbabwe

2009 წლის ვალუტის გადაცვლის კურსით ზიმბაბვეში 1 აშშ დოლარად 30 ათას ზიმბაბვეურს იყიდდით.

2. ვიეტნამური დონგი

ვიეტნამს ზიმბაბვეზე უკეთესი მდგომარეობა აქვს, მაგრამ ჩვენზე ბევრად უარეს დღეში არიან. მიუხედავად იმისა, რომ მათ კუპიურებზე მომღიმარი ხო ში მინი ახატია, დონგის კურსი დოლართან მიმართებით სევდიანად გამოიყურება.

ფოტო: Reserve Bank of Vietnam

ამ ოცი ათას დონგად სულ რაღაც 88 ცენტი მოგივათ.

3. ინდონეზიური რუპია

ეს ვალუტა საშინელ მდგომარეობაშია, მაგრამ ოდესმე გაგიგიათ ინდონეზიელების წუწუნი?

ფოტო: Reserve Bank of Indonesia

ამ 10 ათასიანი კუპიურით 74 ცენტი მოგივათ, ხოლო ერთი დოლარის ყიდვა თუ მოგინდათ, მაშინ 13 500 რუპია უნდა იშოვოთ.

4. კოლუმბიური პესო

პაბლო ესკობარი არაფერ შუაშია, მაგრამ რატომღაც ყოველთვის არის მოლოდინი, რომ კოლუმბიასთან ერთად ამ ადამიანის სახელიც უნდა ახსენონ. რაც შეეხება პესოს, ისიც ლარის ბედს შეჰნატრის.

ფოტო: Banco De La Republica

5 ათას პესოდ მხოლოდ $1.63 მოგივათ. 1.63... 1.63... იყო დრო...

5. ტანზანიური შილინგი

ამ აფრიკულ ვალუტას ლამაზი დიზაინი აქვს და რამდენიმე კუპიურაზე ცხოველებიც ახატია. მაგალითად ამ 2 ათას შილინგიანს:

ფოტო: Bank of Tanzania

თუმცა, რამდენადაც ლამაზია, იმდენად გაუფასურებულიც გახლავთ. თუ ეს ულამაზესი კუპიურა ხელში ჩაგივარდათ, ნუ გაყიდით, შეინახეთ, ალბომში ჩადეთ ან ჩარჩოში, ასე უფრო მეტი ღირებულება ექნება, რადგან სხვანაირად ის სულ რაღაც 91 ცენტი ღირს.

6. სამხრეთკორეული ვონი

სამხრეთ კორეა კარგი კორეაა, აზიაში სიდიდით მეოთხე ეკონომიკის მქონე და მსოფლიოში - მეთერთმეტე ადგილზე მყოფი. შედარებისთვის, საქართველო, 2014 წლის მონაცემებით ორმოცდამეათე ეკონომიკა იყო. მართალია, სამხრეთ კორეელები ყველაფერში გვჯობნიან, ეკონომიკაშიც, ინფრასტრუქტურაშიც, განათლებაში, ცხოვრების დონეშიც და ინტერნეტის სიჩქარითაც, მაგრამ სამაგიეროდ მათი ვონი ლარზე ცუდი ვალუტაა.

ფოტო: Bank of Republic of Korea

მსოფლიოში მეთერთმეტე ეკონომიკა ეძახე და 1000 ვონად 88 ცენტის შესყიდვას შეძლებთ.

7. უგანდური შილინგი

უგანდური შილინგიც ტანზანიური ვალუტასავით ლამაზია და ისეთივე გაუფასურებული.

ფოტო: Anton_Ivanov / Shutterstoc

ამ ულამაზესი და უსაყვარლესი კუპიურის ღირებულება არის 27 ცენტი.

8. სან ტომე და პრინსიპეული დობრე

თუ ამ სტატიამ ლარის კურსით გამოწვეული ტკივილი ვერ შეგიმსუბუქათ, მაშინ შეგიძლიათ იმით დაიმშვიდოთ თავი, რომ ახალი ქვეყნის არსებობის შესახებ გაიგეთ. ეს ქვეყანა კი სან ტომე და პრინსიპია, რომელიც აფრიკაში მდებარეობს. ამ კუნძულოვან სახელმწიფოს, რომლის მოსახლეობაც პორტუგალიურ ენაზე საუბრობს, აქვს ვალუტა, სახელად დობრე, რომელიც ასე გამოიყურება:

ფოტო: Central Bank of San Tome and Principe

10 ათას დობრედ არც მეტი, არც ნაკლები, 43 ცენტი მოგივათ.

9. გვინეური ფრანკი

გვინეური ფრანკი ტანზანიური და უგანდური კუპიურებივით ლამაზი არ არის, მაგრამ არაუშავს. სამაგიეროდ ღირებულებაში უწევს ძალიან სერიოზულ კონკურენციას.

ფოტო: Bank of Guinea

10 ათასი გვინეური ფრანკით $1.08-ის შესყიდვას შეძლებთ.

10. ირანული რიალი

ამ სიაში ბოლო ირანული რიალია, რომელიც არათუ ლარზე, არამედ დობრესა და დონგზე უარეს დღეშია.

ფოტო: Reserve Bank of Iran

1000 ირანული რიალი სულ რაღაც 3 ცენტია.

მოკლედ, როგორც ხედავთ, ჭირში მარტო არ ვართ, ზოგიერთ ქვეყანაზე უკეთესი მდგომარეობაც გვაქვს. აიღეთ თქვენი ლარიანი და შეახარბეთ ზემოთ ჩამოთვლილი ქვეყნების მოქალაქეებს. სხვაში მაინც ვერაფერში გამოიყენებთ.