ახალგაზრდა ფინანსისტთა და ბიზნესმენთა ასოციაცია – აფბა, კომუნიკაციების კომისიას მოუწოდებს შეცვალოს დაგეგმილი სანქციის ფორმა და არ შეუჩეროს ავტორიზაცია კავკასუს ონლაინს. "თუ კომისია მსგავს გადაწყვეტილებას მიიღებს, არსებობს რეალური საფრთხე, რომ საქართველოს მოქალაქეეებისა და ქვეყანაში მოქმედი ბიზნესსუბიექტების დიდი ნაწილი ხარისხიანი ინტერნეტის გარეშე დარჩება" — აცხადებენ არასამთავრობო ორგანიზაციაში.

როგორც საზოგადოებისთვის ცნობილია, კომისიამ სამართალდარღვევად მიიჩნია კავკასუს ონლაინის ბენეფიციარი მესაკუთრის მიერ კუთვნილი 49% წილის გასხვისება კომისიის წინასწარი თანხმობის გარეშე. მან პირველ ეტაპზე მიიღო გადაწყვეტილება "კავკასუს ონლაინისა" და მისი შვილობილი კომპანიის – "რკინიგზის ტელეკომისთვის" სანქციების დაწესების თაობაზე.

დაწესებული ფულადი სანქციები "კავკასუს ონლაინისთვის" 30 000, 90 000 და 270 000 ლარის ოდენობით განისაზღვრა, ხოლო "რკინიგზის ტელეკომის" შემთხვევაში ამ თანხამ 30 000 და 63 930.93 ლარი შეადგინა. ამის შემდეგ, 28 მაისს კომუნიკაციების ეროვნულმა კომისიამ გარიგების გაუქმებასთან დაკავშირებული ვალდებულების შეუსრულებლობის გამო ახალი ადმინისტრაციული წარმოება დაიწყო და მომდევნო ზეპირი მოსმენა 25 ივნისს ჩანიშნა.

კომპანიების წინააღმდეგ სანქციის ფორმად კომუნიკაციების ეროვნული კომისია ავტორიზაციის უფლების შეჩერებას განიხილავს.

ახალგაზრდა ფინანსისტების შეფასებით, კომუნიკაციების ეროვნული კომისიის მიერ კომპანიისთვის ავტორიზაციის უფლების შეჩერებით, ის ავტომატურად შეაჩერებს კომპანიის ბიზნეს საქმიანობას საქართველოში. ამგვარად, კომპანია ვეღარ შეძლებს კლიენტებისათვის საბითუმო და საცალო სატელეკომუნიკაციო მომსახურების მოწოდებას, რაც საკმაოდ რთულ ვითარებაში ჩააყენებს ხარისხიანი ინტერნეტის გარეშე დარჩენილ მოსახლეობას.

აფბას განცხადებით, ავტორიზაციის შეჩერების შედეგად, კომისიის მიერ მიღებული გადაწყვეტილება უარყოფითად აისახება საქართველოს ტელეკომუნიკაციების მთლიან ბაზარზე, რაც თავის მხრივ მნიშვნელოვნად დააზარალებს საბითუმო და საცალო ინტერნეტკავშირის ხარისხს. ასოციაციის განმარტებით, მოვლენების ასეთი სცენარით განვითარების შემთხვევაში, ყველაზე რთულ მდგომარეობაში მომხმარებლები და ინტერნეტ მომსახურების მიმწოდებლები აღმოჩნდებიან.

აღსანიშნავია, რომ კომუნიკაციების ეროვნულ კომისიას არანაირი სამართლებრივი მექანიზმი არ გააჩნია, რომელიც "კავკასუს ონლაინისთვის" და "რკინიგზის ტელეკომისათვის" ავტორიზაციის უფლების შეჩერების შემთხვევაში მომხმარებლებს შესაძლო ზარალისგან დააზღვევს და მსგავსი ხარისხის ალტერნატიულ სერვისის მიწოდებას უზრუნველყოფს.

აფბა-ში აღნიშნავენ, რომ ამ დროისათვის არ არსებობს საქართველოს კომუნიკაციების ეროვნული კომისიის მიერ „არსებით საფრთხესთან“ გამოქვეყნებული დასკვნის დამადასტურებელი ფაქტები და კომისია თავად ადასტურებს, რომ არ ჩაუტარებია არანაირი კვლევა შესრულებული გარიგების კონკურენციაზე უარყოფითი გავლენის დასამტკიცებლად.

"კომისიის გადაწყვეტილება ცალსახად ეყრდნობა გამოუძიებელ ფაქტებსა და გარემოებებს, რაც ეწინააღმდება საქართველოს ელექტრონული კომუნიკაციების შესახებ კანონში მითითებულ შესაბამის დებულებას", — აცხადებენ ასოციაციაში.

აფბა-ს განმარტებით, იმ შემთხვევაში თუ "კავკასუს ონლაინს" შეუჩერდება ავტორიზაცია, ეს მნიშვნელოვნად დააზარალებს კონკურენტულ გარემოს, ვინაიდან ბაზარზე მხოლოდ ორი მოთამაშე დარჩება, რაც ინტერნეტის ხარისხის და მომსახურების ფასების გაუარესების რისკებს მნიშვნელოვნად ზრდის.

ასოციაციაში კომისიის შესაძლო გადაწყვეტილებას უპრეცედენტოს უწოდებენ, რადგან, მათივე თქმით, საქართველოს კომუნიკაციების ეროვნულ კომისიას აქამდე უფლებამოსილი პირის მიერ შესრულებული გარიგების გაუქმება კომისიისგან წინასწარი ნებართვის მიღების ვალდებულების დარღვევის გამო არ მოუთხოვია.

ასოციაციაში იხსენებენ ფაქტს, როდესაც საქართველოს ერთ-ერთი უმსხვილესი სატელეკომუნიკაციო ოპერატორის, VEON Georgia-ს ბენეფიციარული მფლობელობა შეიცვალა. ამ შემთხვევაში ცვლილება კომუნიკაციების ეროვნული კომისიისგან წინასწარი ნებართვის გარეშე მოხდა, ხოლო კომისიამ განცხადების პოსტ-ფაქტუმ შეტანა მოითხოვა და არ დაუყენებია შემდგარი გარიგების კანონიერების საკითხი.

შესაბამისად, ახალგაზრდა ფინანსისტთა და ბიზნესმენთა ასოციაციაში აცხადებენ, რომ დაუშვებელია კერძო კომპანიასა და კომუნიკაციების მარეგულირებელი კომისიას შორის მიმდინარე დავამ მოსახლეობის ზურგზე გადაიაროს და საცალო თუ საბითუმო ინტერნეტის მომხმარებლების საკმაოდ დიდი ნაწილი ინტერნეტის გარეშე დარჩნენ.

"ამავდროულად, გაურკვვეველია რამდენ ხანს გაგრძელდება არსებული დავა და რა პერიოდის განმავლობაში დარჩებიან აბონენტები ხარისხიანი ევროპული ინტერნეტის გარეშე" - ნათქვამია ახალგაზრდა ფინანსისტთა და ბიზნესმენთა ასოციაციიის მიერ გავრცელებულ განცხადებაში.