საერთაშორისო გამჭვირვალობა — საქართველოს ინფორმაციით ბიძინა ივანიშვილის ნათესავმა, მურმან ტოგონიძემ 2014 წლიდან დღემდე იმერეთის ცალკეული მუნიციპალიტეტის ბიუჯეტიდან ტენდერებისა და გამარტივებული შესყიდვების მეშვეობით 16,395,501 ლარი მიიღო.

ორგანიზაციაში აღნიშნავენ, რომ მურმან ტოგონიძე ბიძინა ივანიშვილის დის, მაგული ივანაშვილის მულის ქმარია.

მათივე ინფორმაციით, ის ტენდერებში ინდივიდუალური მეწარმის სტატუსით მონაწილეობს, შპს "მშენინვესტი" კი, რომლის 100% წილს მურმან ტოგონიძე ფლობდა, სახელმწიფო შესყიდვებში მხოლოდ 2016 წელს მონაწილეობდა.

"ინდივიდუალურმა მეწარმემ, მურმან ტოგონიძემ 97 ტენდერიდან 69 შემთხვევაში გაიმარჯვა. ხელშეკრულებების ჯამურმა ღირებულებამ 14,998,590 ლარი შეადგინა. შპს "მშენინვესტი" 2016 წელს 31-ჯერ მონაწილეობდა სახელმწიფო შესყიდვებში, 21 შემთხვევაში გაიმარჯვა და ჯამურად 1,008,798 ლარი მიიღო", — აღნიშნავენ TI-ში.

აღსანიშნავია ისიც, რომ მურმან ტოგონიძისა და მისი კომპანიისგან მომსახურებების ყველაზე მსხვილი შემსყიდველი საჩხერის მუნიციპალიტეტია (70 ტენდერი და 3 გამარტივებული შესყიდვა). შემსყიდველები ასევე არიან ჭიათურის, ლაგოდეხისა და ბაღდათის მუნიციპალიტეტები.

ფოტო: საერთაშორისო გამჭვირვალობა — საქართველო

გარდა ამისა, TI-მ მოიკვლია, რომ მურმან ტოგონიძესა და შპს "მშენინვესტთან" 2014-2016 წლებში საჩხერისა და ჭიათურის მუნიციპალიტეტებმა გამარტივებული შესყიდვის 9 ხელშეკრულება გააფორმეს, ჯამური ღირებულებით 388,112 ლარი.

ფოტო: საერთაშორისო გამჭვირვალობა — საქართველო

ფოტო: საერთაშორისო გამჭვირვალობა — საქართველო

საერთაშორისო გამჭვირვალობა მიუთითებს კიდევ ერთ საინტერესო დეტალზე — მურმან ტოგონიძესა და მის "მშენინვესტს" მოგებული 90 ტენდერიდან 42 შემთხვევაში კონკურენტი არ ჰყოლია. მნიშვნელოვანია ისიც, რომ 20 შემთხვევაში ტენდერში მონაწილე სხვა სუბიექტმა ვაჭრობისას დაბალი ღირებულება დააფიქსირა, თუმცა სატენდერო კომისიამ მათ დისკვალიფიკაცია მისცა და ხელშეკრულება მურმან ტოგონიძესთან გააფორმა. 9 შემთხვევაში მურმან ტოგონიძემ ტენდერი მოიგო დაბალი ფასის მითითებით, თუმცა ხელშეკრულების ღირებულება მოგვიანებით გაიზარდა.

ფოტო: საერთაშორისო გამჭვირვალობა — საქართველო

ფოტო: საერთაშორისო გამჭვირვალობა — საქართველო

საერთაშორისო გამჭვირვაობა — საქართველოს ინფორმაციით, მურმან ტოგონიძე 2017-2018 წლებში შპს "საჩხერგზას" დირექტორიც იყო, რომელმაც ამ პერიოდში საჩხერის მუნიციპალიტეტის 2 ტენდერი მოიგო, ჯამური ღირებულებით — 120,521 ლარი. ეს კომპანია მმართველის შეცვლის შემდეგაც მონაწილეობს ტენდერებში.

TI მოუწოდებს სახელმწიფო უსაფრთხოების სამსახურის ანტიკორუფციულ სააგენტოს და გენერალურ პროკურატურას, შეისწავლონ მურმან ტოგონიძისა და "მშენინვესტის" მიერ მოგებული ტენდერები და დაადგინონ, ხომ არ იყო ისინი ტოგონიძისა და მისი კომპანიისათვის სასურველ პირობებში გამოცხადებული და შეიცავდა თუ არა კორუფციის შესაძლო ნიშნებს.