თუ კორონავირუსის პანდემიის პირობებში კინოინდუსტრია შეძლებს, რომ ფილმების წარმოება კვლავ აღადგინოს, მაშინ მაყურებლებს უკვე შეუძლიათ დაიწყონ ლოდინი ვარსკვლავური შემადგენლობით ახალი ფილმის ნახვამდე: ქეით ბლანშეტი, რობერტ დე ნირო, ენ ჰეთეუეი და ოსკარ აიზეკი ერთად მიიღებენ მონაწილეობას მომავალ პროექტში.

ფილმის რეჟისორი ჯეიმს გრეია, რომელმაც გასულ წელს ბრედ პიტის მონაწილეობით Ad Astra გამოუშვა. ახალ კინოსურათს Armageddon Time ერქმევა და ის რეჟისორის ბიოგრაფიული ელემენტებით რონალდ რეიგანის პრეზიდენტობის დროინდელ ამერიკას გააცოცხლებს.

როგორც თავად ჯეიმს გრეი აცხადებს, მას სურს, რომ Ad Astra-სგან სრულიად განსხვავებული ფილმი გადაიღოს:

"ყოველი ფილმი, რომელსაც იღებ, ერთმანეთისგან განსხვავდება, მაგრამ ახლა ვცდილობ, ჩემ მიერ ბოლოს გადაღებული ფილმის მასშტაბურობის, სიმარტოვისა და ბნელი სიცარიელისგან რადიკალურად განსხვავებული რამ გავაკეთო. ძალიან მსურს, რომ რაღაც მთლიანად ადამიანებზე, მათ ემოციებსა და ერთმანეთს შორის ურთიერთობებზე შევქმნა ისე, რომ ეს ყველაფერი სითბოთი და სინაზით იყოს სავსე".

ჯეიმს გრეიმ აღნიშნა, რომ მისი შემდეგი ფილმი პოლიტიკური და ისტორიული თემატიკის იქნება, რომელიც რეჟისორის ბავშვობის დროინდელი მოგონებებით 80-იანი წლების ამერიკაში მუშათა კლასის ოჯახის ყოველდღიური ცხოვრების შესახებ მოგვითხრობს.

ბრედ პიტი ფილმში Ad Astra.

ფოტო: Twentieth Century Fox

აღსანიშნავია, რომ რობერტ დე ნირომ და ენ ჰეთეუეიმ აქამდე ერთად ითამაშეს 2015 წელს გამოსულ კომედიურ დრამაში The Intern. დე ნირო ლეონარდო დიკაპრიოსთან ერთად ასევე იღებს მონაწილეობას მარტინ სკორსეზეს ახალ ფილმში Killers of the Flower Moon, რომლის შექმნაზეც მუშაობა ამჟამად პანდემიის გამო შეფერხებით მიმდინარეობს.

რაც შეეხება ქეით ბლანშეტს, ვიცით, რომ მას ასევე ვიხილავთ ცნობილი ვიდეოთამაშის Borderlands ეკრანიზაციასა და გილერმო დელ ტოროს ახალ ფილმში Nightmare Alley. ხოლო ოსკარ აიზეკს წესით ამ წლის ბოლომდე ვიხილავთ დენის ვილნევის მაღალი მოლოდინების მქონე სამეცნიერო ფანტასტიკაში Dune.