პრემიერ-მინისტრი, გიორგი გახარია 20 ივნისის აქციის მოვლენებზე საუბრისას ამბობს, რომ ტრაგიკული შემთხვევები რაც მოხდა, "მუდმივი ტვირთი" იქნება, მაგრამ გაკვეთილი და პოლიტიკური შედეგი უნდა იყოს ეს [რომ აღარ განმეორდეს]. პირველ არხთან ინტერვიუში პრემიერმა აღნიშნა ისიც, რომ აქციის ღამეს ხელისუფლების პასუხისმგებლობის განხორციელების დროს "გარკვეული სამწუხარო შედეგები" დადგა, ყველასთის, "ჩემთვის პირველ რიგში".

"ჩვენ თუ ამ ყველაფრიდან გამოვიტანთ ისეთ გაკვეთილს, რომ ჩვენს მომავალ პოლიტიკურ ცხოვრებაში, ჩვენი შვილების პოლიტიკურ ცხოვრებაში აღარ განმეორდეს პარლამენტზე თავდასხმა, პოლიტიკური მიზნის მისაღწევად, ეს წინგადადგმული ნაბიჯი იქნება. მე, როგორც რიგითი მოქალაქე, ამით დავკმაყოფილდები. [...] ხშირად მსმენია, გავრილოვი... მესმის, ვეთანხმები კიდეც, მაგრამ შტურმი შენი ქვეყნის უმაღლეს ორგანოზე, და თავდასხმა პოლიციელებზე, შეუძლებელია, გაამართლო".

2019 წლის 20 ივნისს აქცია მას შემდეგ დაიწყო, რაც რუსეთის დუმის დეპუტატი საქართველოს პარლამენტის თავმჯდომარის სავარძელში დაჯდა. ხალხმრავალი აქცია პარლამენტის თავმჯდომარის გადადგომის მოთხოვნით გაგრძელდა. ირაკლი კობახიძე მხოლოდ მომდევნო დღეს გადადგა, მანამდე სპეცრაზმმა აქციაზე შეკრებილები ცრემლსადენი გაზისა და რეზინის ტყვიების გამოყენებით დაშალა. რამდენიმე მოქალაქემ დაკარგა თვალი. მთავრობა ამტკიცებს, რომ შეკრებილები პარლამენტის შტურმით აღებას აპირებდნენ და მათ წინააღმდეგ გამოძიებას აწარმოებს.