უმრავლესობის წევრი, რომან კაკულია ამბობს, რომ ის, ვისაც ყველაზე მეტად არ აწყობს არჩევნების გადადება, ქართული ოცნებაა. მისი თქმით, თუ არჩევნების თარიღის ცვლილებაზეა საუბარი, რაც შეიძლება მალე, მხოლოდ უკან გადმოწევას მიესალმებოდა.

როგორც კაკულია ამბობს, ამერიკელი კონგრესმენების წერილებიდან დაწყებული, ისეთი საკითხებია დღის წესრიგში დამდგარი, სანამ მათ მიმართ საზოგადოების აზრის გამოხატვა სანამ არ მოხდება, ვერავითარ პროგრესს ვეღარ განიცდიან.

"რაც უფრო მალე გაირკვევა საზოგადოება ვის რა სახელს არქმევს, ვის როგორ აღიქვამს, ეს ძალიან მალეა გასაკეთებელი. ამიტომ არჩევნების გადატანას იქით კი არა, აქეთ მივესალმებოდი, რათა მალე გაირკვეს ეს ყველაფერი. მსოფლიოში უკვე ყველამ ყველაფერზე გამოთქვა აზრი, გარდა ქართული საზოგადოებისა. ამიტომ რაც უფრო მალე მოხდება ამ აზრის გამოთქმა ყველა მიმდინარე საკითხთან მიმართებაში, ორიენტაციისთვის, რათა ჩამოყალიბდეს საზოგადოება, როგორ განვითარდეს — ეს მნიშვნელოვანია. მე უბრალოდ გული მწყდება, რომ ბევრი თვეა დარჩენილი არჩევნებამდე. ამიტომ არანაირად არ დავუჭერ მხარს არჩევნების გადადებას, უკიდურესი აუცილებლობის გარდა", — განაცხადა კაკულიამ.

ქართული ოცნების აღმასრულებელმა მდივანმა, ირაკლი კობახიძემ თქვა, რომ თუ COVID-19-ის მე-2 ტალღა ოქტომბრამდე იქნება, არჩევნები დეკემბრისთვის გადაიწევს. კობახიძე ვარაუდობს, რომ თუ კორონავირუსის მეორე ტალღა დაემთხვევა არჩევნებამდე პერიოდს [31 ოქტომბრამდეა], თეორიულად, არჩევნების თარიღის გადაწევა შესაძლებელია. მანვე აღნიშნა, რომ ეს იმ შემთხვევაში მოხდება, თუკი მთავრობა ოქტომბერში ისევ საგანგებო მდგომარეობას გამოაცხადებს. კანონით კი, არჩევნები საგანგებო მდგომარეობის გაუქმებიდან არაუადრეს 45 დღისა და არაუგვიანეს 60 დღისა უნდა ჩატარდეს.