ეკონომიკის მინისტრის მოადგილემ დავით ხუციშვილმა გადაცემა ბიზნესკონტრაქტის ეთერში სტუმრობისას განაცხადა, რომ სამინისტრო ექსპერტებთან ერთად განიხილავს ფასიანი გზების ამოქმედების საკითხს, რაც, მისი თქმით, გზების უსაფრთხოებისთვის მოწყობილი ინფრასტრუქტურის ხარჯების დაფარვაში დაეხმარებათ:

"მსოფლიოში აპრობირებულია დაფინანსების მექანიზმები. ერთის მხრივ, ჩვენ შევძლოთ საგზაო ინფრასტრუქტურის ექსპლუატაციის მიმდინარე ხარჯების დაფინანსება, და მეორეს მხრივ შემოსავლის წყარო გავაჩინოთ იმისთვის, რომ წვლილი შევიტანოთ საგზაო უსაფრთხოებისთვის საკითხის ამაღლების კუთხით".

მინისტრის მოადგილემ დასძინა, რომ საგზაო უსაფრთხოება სერიოზული გამოწვევაა, რადგანაც საქართველოში ყოველწლიურად 600-მდე ადამიანი ეწირება საგზაო შემთხვევებს.

"ფასიანი გზები საქართველოში სამწუხაროდ არ არსებობს, ეკონომიკის სამინისტრო საერთაშორისო ექსპერტებთან ერთად უკვე მუშაობს ამ კუთხით, ვაპირებთ შევიმუშაოთ მიდგომა, რომელსაც მთავრობას შევთავაზებთ" - აღნიშნა მან.

ხუციშვილის თქმით, ბუნებრივია ეს იქნება ალტერნატივა და თუ ფასიანი გზა იარსებებს, უნდა იყოს უფასო გზაც:

"მძღოლს უნდა ჰქონდეს საშუალება ისარგებლოს უფასო გზით და თუ სურვილი ექნება, ისარგებლოს ფასიანი გზით".

ხუციშვილის თქმით, ამ ეტაპზე მხოლოდ მიდგომების შემუშავება ხდება და მთავრობა გადაწყვეტს, განხორციელდება თუ არა ეს სტრატეგია 2017 წელს.