ქართული ოცნების ლიდერი, პარლამენტის ყოფილი სპიკერი, ირაკლი კობახიძე ვარაუდობს, რომ თუ კორონავირუსის მეორე ტალღა დაემთხვევა არჩევნებამდე პერიოდს [31 ოქტომბრამდეა], თეორიულად, არჩევნების თარიღის გადაწევა შესაძლებელია. მანვე აღნიშნა, რომ ეს იმ შემთხვევაში მოხდება, თუკი მთავრობა ოქტომბერში ისევ საგანგებო მდგომარეობას გამოაცხადებს. კანონით კი, არჩევნები უნდა ჩატარდეს საგანგებო მდგომარეობის გაუქმებიდან არაუადრეს 45 დღისა და არაუგვიანეს 60 დღისა.

კობახიძის თქმით, კონსტიტუციის თანახმად, წელს არჩევნები 31 ოქტომბერს უნდა გაიმართოს, მეორე ტური კი, წესით — 21 ნოემბერს:

"თუკი 21 ნოემბრამდე არ იქნება მეორე ტალღა, ამ შემთხვევაში ჩვეულებრივად ტარდება არჩევნები, მაგრამ თუ 31 ოქტომბრამდე მოუწია მეორე ტალღა, საუბარია კონსტიტუციურ მოცემულობაზე, სასწორზე დგას ორი რამ: ერთია ეპიდემიის გავრცელება, საუბარია იმაზეც, რომ მეორე ტალღა შეიძლება, უფრო მძიმეც იყოს, ბუნებრივია, არჩევნები შეიძლება გახდეს ეპიდემიის გავრცელების წყარო. მეორე არის არჩევნების თარიღი. ამ შემთხვევაში პასუხს იძლევა კონსტიტუცია, პასუხი არის შემდეგი: თუ აუციელებელი იქნება პირობითად ოქტომბერში საგანგებო მდგომარეობის გამოცხადება ეპიდემიის სამართავად, ამ შემთხვევაში ცხადდება საგანგებო მდგომარეობა, გაუქმდება რაღაც პერიოდში და აქედან 45-დან 60 დღემდე ვადაში ტარდება უკვე არჩევნები. ეს შეიძლება იყოს, დეკემბერი, შეიძლება იყოს იანვარი, მე ვსაუბრობ კონსტიტუციიდან გამომდინარე, თუმცა კიდევ ერთხელ გამოვთქვამ იმედს, რომ ეს არ მოხდება".

ირაკლი კობახიძემ, ასევე, განმარტა, რომ როგორი ეპიდემიოლოგიური მაჩვენებელიც არ უნდა იყოს ოქტომბრისთვის, გარკვეული უსაფრთხოების წესები მაინც უნდა დადგინდეს საარჩევნოდ.