შინაგან საქმეთა სამინისტროს ცნობით, ბათუმის საკათედრო ტაძრის გაქურდვის ბრალდებით ერთი პირი დააკავეს. სამინისტრო იუწყება, რომ ბრალდებული წარსულში ქურდობისთვის ნასამართლევია და ამჟამად პირობითი მსჯავრის ქვეშ არის. მას სადგომში ან სხვა საცავში უკანონო შეღწევით არაერთგზის ჩადენილ ქურდობაში ედება ბრალი.

გამოძიების ვერსიით, ბრალდებული მიმდინარე წლის 2 ივნისს, ბათუმში მდებარე საკათედრო ტაძარში მართლსაწინააღმდეგოდ დაეუფლა 30 ლარამდე თანხას და საეკლესიო ნივთებს, რის შემდეგაც შემთხვევის ადგილიდან მიიმალა.

შსს-ს მტკიცებით, მიმდინარე წლის მარტში, ბრალდებულმა ბათუმში, ერთ-ერთ მოქალაქეს საფულე და მობილური ტელეფონი მოპარა, ხოლო მაისში სავაჭრო ჯიხური გაქურდა და გასაყიდ სუვენირებს უკანონოდ დაეუფლა.

გამოძიება სისხლის სამართლის კოდექსის 177-ე მუხლის მე-2 ნაწილის "ა" და "ბ" ქვეპუნქტებით და ამავე მუხლის მე-3 ნაწილის "ბ" ქვეპუნქტით მიმდინარეობს, რაც გულისხმობს სადგომში ან სხვა საცავში უკანონო შეღწევით არაერთგზის ჩადენილ ქურდობას, რამაც მნიშვნელოვანი ზიანი გამოიწვია. დანაშაული 3-დან 7 წლამდე ვადით თავისუფლების აღკვეთას ითვალისწინებს.

ბათუმში ღვთისმშობლის შობის საკათედრო ტაძარი 2 ივნისს გაქურდეს.