დამოუკიდებელი დეპუტატის და პარტია სამართლიანობისთვის ლიდერის, ეკა ბესელიას განცხადებით, საკუთარ კანდიდატურას მაჟორიტარად არ გამორიცხავს. მან აღნიშნა, რომ ოპოზიციის შეთანხმების მიუხედავად, შეიძლება საკუთარი კანდიდატურა დამოუკიდებლადაც დააყენოს. ამ თემაზე ბესელიამ TV პირველის ეთერში ისაუბრა.

"საკუთარ კანდიდატურასაც განვიხილავ და ვფიქრობ ამაზე, რომ ეს შეიძლება საჭირო იყოს არა პირადად ჩემთვის, არამედ ახალი პარტიისთვის, რომელსაც მე ვუდგავარ სათავეში — სამართლიანობისთვის. [...] ჯერ ვაკვირდები პროცესს, შეიძლება მივიღო ეს გადაწყვეტილება", — თქვა ეკა ბესელიამ.

დეპუტატის თქმით, ამჟამად კონსულტაციებს რამდენიმე ცალკეულ პარტიებთან გადის და საბოლოო გადაწყვეტილებას საკონსტიტუციო ცვლილებების მიღების შემდეგ გააჟღერებს.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

4 ივნისს ნაციონალურ მოძრაობაში განაცხადეს, რომ თბილისში 8 მაჟორიტარული ოლქიდან 6 ოპოზიციის კანდიდატებს დაუთმოს. ამავე დროს, პარტია წინასაარჩევნო კამპანიას თბილისის მხოლოდ ორ რაიონში — გლდანსა და სამგორში დაიწყებს.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.

ამავე თემაზე: