შინაგან საქმეთა სამინისტროს ინფორმაციით, ახალშობილის გარდაცვალების საქმეზე არასრულწლოვანი გოგო, სოციალური მუშაკისა და ფსიქოლოგის მონაწილეობით, მოწმის სტატუსით დაკითხეს. მათი განცხადებით, დანიშნულია შესაბამისი ექსპერტიზები და საქმეზე გამოძიება გრძელდება ყველა შესაბამისი ვერსიის გადამოწმებისა და მტკიცებულებების შეგროვების მიზნით.

გუშინ, 2 ივნისს გლდანის ხევში გარდაცვლილი ახალშობილი იპოვეს. უწყებაში აცხადებენ, რომ შემთხვევის ადგილას ჩატარდა გადაუდებელი საგამოძიებო მოქმედებები, მათ შორის, შემდგომი საექსპერტო კვლევისთვის ახალშობილის ცხედარი გადაასვენეს ლევან სამხარაულის სახელობის სასამართლო ექსპერტიზის ეროვნულ ბიუროში. მათი თქმით, გავრცელებული ინფორმაცია ცხედრის გადაგდების შესახებ, სიმართლეს არ შეესაბამება.

უწყება მოუწოდებს ყველა მედიასაშუალებას, რომ არასრულწლოვნის საუკეთესო ინტერესიდან და საქმის სენსიტიურობიდან გამომდინარე, აღნიშნული თემის გაშუქებისას დაიცვან საქართველოს კანონმდებლობით, მათ შორის, არასრულწლოვანთა მართლმსაჯულების კოდექსით დადგენილი მოთხოვნები და არ მოახდინონ არასრულწლოვნის უფლებების შელახვის პროვოცირება.

მომხდარზე გამოძიება საქართველოს სისხლის სამართლის კოდექსის 112-ე მუხლით მიმდინარეობს, რაც დედის მიერ მშობიარობისას ან მშობიარობის შემდეგ უმალვე ახალშობილის განზრახ მკვლელობას გულისხმობს.