ადამიანის უფლებათა ცენტრი ყვარლის მუნიციპალიტეტის ზოგიერთ სოფელში გოგონათა გენიტალიების დასახიჩრებას და ამ ფაქტების რელიგიური ტრადიციების საფუძვლით გამართლებას შემაშფოთებლად მიიჩნევს.

ორგანიზაცია მოითხოვს აღნიშნულ ფაქტებზე დაიწყოს გამოძიება და ხელისუფლებამ დროულად მოახდინოს სტამბულის კონვენციის რატიფიცირება:

  • დაიწყოს გამოძიება ყვარლის მუნიციპალიტეტის ზოგიერთ სოფელში ქალთა გენიტალიების დასახიჩრების ფაქტებთან დაკავშირებით და განხორციელდეს პრევენციული ღონისძიებები ქალთა ჯანმრთელობის ხელყოფისა და მათი სხეულის კონტროლის აღკვეთის მიზნით;
  • დროულად განხორციელდეს ევროსაბჭოს 2011 წლის სტამბულის კონვენციის - "ქალთა მიმართ ძალადობისა და ოჯახში ძალადობის წინააღმდეგ ბრძოლისა და პრევენციის შესახებ" რატიფიცირება, სადაც ცალკე მუხლი ეთმობა "ქალის გენიტალიების დასახიჩრებას";
  • გატარდეს შესაბამისი ღონისძიებები გაეროს გენერალური ასამბლეის 2014 წლის 18 დეკემბრის რეზოლუციის იმპლემენტაციისა და შესრულების მიზნით, რათა თავიდან იქნას აცილებული გოგონათა მიმართ განხორციელებული ძალადობის ფაქტები.

ადამიანის უფლებათა ცენტრი მიიჩნევს, რომ ქალთა გენიტალიების დასახიჩრება ადამიანის წამებასა და არაადამიანურ მოპყრობას უთანაბრდება.

ორგანიზაციის აზრით, რელიგიური ტრადიციით წამების გამართლება შეუთავსებელია ბავშვის უფლებების კონვენციასთან და ადამიანის უფლებების დაცვის საერთაშორისო სტანდარტებთან.

გოგონათა წინადაცვეთის პრაქტიკა საქართველოში საერთაშორისო ორგანიზაცია "ომისა და მშვიდობის გაშუქების ინსტიტუტის" (IWPR) მიერ ჩატარებული ჟურნალისტური გამოძიების შედეგად გამოვლინდა.