იუსტიციის მინისტრი, თეა წულუკიანი ამბობს, რომ საარჩევნო სისტემასთან დაკავშირებული საკონტიტუციო ცვლილებები არა მმართველ გუნდს, არამედ ოპოზიციას სჭირდება, რომ როგორმე პარლამენტში მოხვდნენ. მისი თქმით, სახელისუფლებო გუნდი ერთსულოვანია და ცვლილებებს კენჭს ერთხმად უყრის.

"ეს არის ის ცვლილებები, რომელიც ჩვენ არ გვჭირდება. ეს არი ის ცვლილებები, სჭირდება ოპოზიციას და შეთანხმებისამებრ ჩვენ ამ ცვლილებებს გავატარებთ სიცოცხლეში. თუკი ოპოზიცია, ვგულისხმობ ერთ ან მეტ კონკრეტულ ძალას, რომელიც კვლავ ამბობს, რომ 8 მარტის შეთანხმება არ სრულდებაო, არ მისცემს ამ ცვლილებებს ხმას, ეს იქნება მხოლოდ საბაბი იმისა, რომ ჩაშალონ ეს რეფორმა, რომელიც, რეალურად, მათივე მოთხოვნით და მათივე ინიციატივით ტარდება. კიდევ ერთხელ ვამბობ, მათთვისვე არის საჭირო, რომ ეგებ როგორმე მოხვდნენ პარლამენტში", — განაცხადა წულუკიანმა.

როგორც ცნობილია, 8 მარტის შეთანხმებით გათვალისწინებული ცვლილებები 120/30-ზე საარჩევნო სისტემას გულისხმობს. ოპოზიციის წევრები აცხადებენ, რომ შეთანხმების ნაწილი პოლიტიკური პატიმრების ციხიდან გამოშვებაცაა და თუკი გიორგი რურუას არ გაათავისუფლებენ, ცვლილებებს მათი მხარდაჭერა არ ექნება.