ბოლო თვეების განმავლობაში ცივ ამინდებს ცხელი ჩაით თუ ვებრძოდით, ზაფხულის მოახლოებასთან ერთად ტემპერატურაც იმატებს და უფრო მეტად მიგვიწევს გული ცივი სასმელებისა და კერძებისაკენ.

სწორედ ამიტომ განსაკუთრებით მნიშვნელოვანია, რომ სწორად განვსაზღვროთ დღის რაციონი და გაზიანი სასმელებისა თუ ტკბილი დესერტების ჭარბი მიღებით ჯანმრთელობას პრობლემები არ შევუქმნათ.

აღნიშვნა არ სჭირდება იმას, რომ სიცხესთან საბრძოლველად ცივი წყალი ყველაზე უებარი საშუალებაა და ამავდროულად აუცილებელიც: ზაფხულში განსაკუთრებით მაღალია გაუწყლოების რისკი, შესაბამისად, ამ პერიოდში მაქსიმალურად ბევრი წყალი უნდა მივიღოთ.

ახლა კი კიდევ რამდენიმე ძალიან მარტივ და ჯანსაღ რეცეპტს შემოგთავაზებთ, რომლებიც თქვენი ზაფხულის დღეებს გააგრილებს და კიდევ უფრო გაამრავალფეროვნებს.

1. ცივი ჩაი

ფოტო: Freepik

ინგრედიენტები:

  • 1 ცალი ლიმონი
  • 3-4 ცალი ჩაის პაკეტი
  • 1 ლიტრა წყალი
  • 2-3 სუფრის კოვზი შაქარი (უკეთეს შემთხვევაში თაფლი)
  • პიტნის 4 ფურცელი

დაასხით ადუღებული და შეგრილებული წყალი ჩაის პაკეტებს. სანამ ჩაი დაყენდება, მანამდე დაჭერით ნახევარი ლიმონი და ჩაყარეთ ბოთლში, დოქში ან სხვა ნებისმიერ სასურველ ჭურჭელში, მეორე ნახევარი კი ჩააწურეთ. დაამატეთ შაქარი და პიტნის ფურცლები, ბოლოს კი შეგრილებული ჩაი. მოურიეთ კარგად და შედგით მაცივარში, მოგვიანებით კი სურვილის შემთხვევაში ყინულის კუბებთან ერთად მიირთვით.

2. ცივი ჩაი ხილით

ფოტო: Freepik

ინგრედიენტები:

  • 3-4 ცალი ჩაის პაკეტი
  • 1 ლიტრა წყალი
  • 2-3 სუფრის კოვზი შაქარი (უკეთეს შემთხვევაში თაფლი)
  • პიტნის 4 ფურცელი
  • სეზონური ხილი — მარწყვი, ჟოლო, ფორთოხალი, ატამი

წინა რეცეპტის მსგავსად ამჯერადაც იმავე ნაბიჯებს მიჰყვებით, უბრალოდ ლიმონის ნაცვლად ჩაის თქვენთვის სასურველ ხილს ან რამდენიმე ხილის კომბინაციას ამატებთ. ასევე შეგიძლიათ არომატისთვის ჩააწუროთ ლიმონიც, თქვენს ნებაზეა. სასურველია, რომ ჩაი რამდენიმე საათის განმავლობაში იყოს მაცივარში და კარგად გაცივების შემდეგ მიირთვათ.

3. ლიმონათი

ფოტო: Freepik

ინგრედიენტები:

  • 5-6 ცალი ლიმონი
  • 1 ლიტრა წყალი (სურვილის შემთხვევაში, გაზიანი)
  • შაქარი გემოვნებით (ან თაფლი)
  • პიტნა
  • ყინულის კუბები

ლიმონათის მომზადება ძალიან ჰგავს ცივი ჩაის რეცეპტს, უბრალოდ ამჯერად ჩაის ნაცვლად მხოლოდ წყალს იყენებთ, თუ სურვილი გაქვთ — გაზიანს. სხვა ყველა ინგრედიენტს შეურიეთ 4-5 ცალი დაწურული ლიმონის წვენი, ერთი ცალი კი ცოცხლად ჩააჭერით. მორჩა, შედგით მაცივარში და გაცივების შემდეგ ჯანსაღად ჩაისველეთ ყელი.

4. არაალკოჰოლური სანგრია

ფოტო: Timolana / Freepik

ინგრედიენტები:

  • 2 ცალი ლიმონი
  • 2 ცალი ფორთოხალი
  • ორი ცალი ატამი
  • შაქარი გემოვნებით (ან თაფლი)
  • რამდენიმე ცალი კენკრის რომელიმე სახეობა
  • ორი ლიტრი წყალი
  • ყინულის კუბები

ატამი და ერთი ცალი ფორთოხალი დაჭერით, მეორე ფორთოხალი და ლიმონი კი ჩააწურეთ. ჩაამატეთ კენკრა, ყინულის კუბები და შაქარი წყალთან ერთად, მოურიეთ და შედგით მაცივარში გასაციებლად.

5. ვეგანური ნაყინი

ფოტო: Getty

ინგრედიენტები:

  • 2 ცალი ბანანი
  • ნებისმიერი კენკრა (სურვილის შემთხვევაში)
  • წყალი (სურვილის შემთხვევაში)

საყინულეში გაყინეთ ბანანი, შემდეგ გამოიღეთ და 10 წუთი აცადეთ გალღობა. შემდეგ დააბლენდერეთ სურვილის შემთხვევაში რომელიმე სასურველ კენკრასთან ერთად. შეგიძლიათ დაამატოთ ერთი სუფრის კოვზი წყალიც, თუ გსურთ უფრო თხელი კონსისტენცია მიიღოთ. შეიძლება მეტისმეტად მარტივი რეცეპტი ჩანს, თუმცა დაგვერწმუნეთ, ნამდვილად გემრიელ შედეგს მიიღებთ და გემოვნებისამებრ სხვა არომატებითაც შეგიძლიათ გაამდიდროთ ის.