პრემიერმინისტრმა გიორგი კვირიკაშვილმა მთავრობის სხდომაზე სიტყვით გამოსვლისას ქვეყნის განვითარების გეგმაზე ისაუბრა, რაც მისი მთავრობის პრიორიტეტი იქნება:

"ამ გეგმის უპირველესი პრიორიტეტი გახლავთ ქვეყანაში განათლების სისტემაში ძირეული ცვლილებები და ჩვენი ხელისუფლება განათლებას აცხადებს ნომერ პირველ პრიორიტეტად. იქნება ეს უმაღლესი განათლება, ეს არის დაწყებითი განათლება, საშუალო განათლება და უპირველეს ყოვლისა პროფესიული განათლება, რომელზეც განსაკუთრებული აქცენტი გაკეთდება, დაემყარება საჯარო და კერძო პარტნიორობის მოდელს, დუალური განათლების პრინციპს, როდესაც, სამუშაო ადგილზე პარალელურად მიმდინარეობს სწავლება".

კვირიკაშვილის თქმით, პროფესიული განათლების ეს სისტემა ხელმისაწვდომი იქნება არა მხოლოდ ახალგაზრდებისთვის, არამედ, ნებისმიერი ასაკის ადამიანისთვის:

"არსებული მოთხოვნებიდან გამომდინარე, ყველა ადამიანმა მოკლევადიან პერიოდში უნდა შეიძინოს ის უნარ-ჩვევები, რომელიც მას პირდაპირ ჩართავს შრომის ფერხულში და დაასაქმებს დროის უმოკლეს პერიოდში. მეცნიერებას განსაკუთრებული პრიორიტეტი მიენიჭება და იმ ტრადიციულად ძლიერ მიმართულებებს, რომლითაც საქართველო ყოველთვის იყო გამორჩეული".

საქართველოს პრეზიდენტმა გიორგი კვირიკაშვილი პრემიერმინისტრად დღეს დანიშნა.

ნახეთ გიორგი კვირიკაშვილის გუშინდელი გამოსვლა სრულად.