აშშ-ს სახელმწიფო დეპარტამენტის პრესსპიკერი, მორგან ორტაგუსი, საქართველოში აშშ-ს საელჩოს განცხადებას იზიარებს, სადაც რუსეთის მხრიდან ბორდერიზაციასა და ლუგარის ლაბორატორიასთან დაკავშირებით დეზინფორმაციის გავრცელებას გმობენ.

როგორც ორტაგუსი საკუთარ ტვიტერზე წერს, რუსეთმა უნდა დაასრულოს საქართველოს ოკუპაცია და ოკუპირებულ რეგიონებში ჰუმანიტარულ დახმარებების დაშვება უნდა მოხდეს.

"აშშ გმობს რუსეთის ძალების მიერ ბორდერიზაციის გაგრძელებას. ისევ მოვუწოდებთ რუსეთ, რომ დაასრულოს საქართველოს ტერიტორიების 20%-ის ოკუპაცია და შეასრულოს 2008 წელს აღებული ვალდებულებები, გაიყვანოს თავისი ძალები და დაუშვას ჰუმინატარული დახმარების შეუფერხებლად მიწოდება", — წერს ორტაგუსი.

აშშ-ს საელჩო განცხადებას ავრცელებს, სადაც ნათქვამია, რომ აშშ პროტესტს გამოთქვამს საოკუპაციო ხაზთან ე.წ. საზღვრის უკანონო გადმოწევაზე და ამაზე არანაკლებ შემაშფოთებელია დეზინფორმაცია ლუგარის ცენტრზე.

"იმ ფონზე, როდესაც მსოფლიო ულოცავს საქართველოს დამოუკიდებლობის იუბილეს და აღნიშნავს საქართველოს წარმატებას კოვიდ 19-ის წინააღმდეგ ბრძოლაში, ამერიკის შეერთებული შტატები პროტესტს გამოთქვამს მიმდინარე, პროვოკაციულ ბორდერიზაციასთან დაკავშირებით, რომელსაც ახორციელებს რუსეთისგან მართული უშიშროების ძალები, რუსეთის მიერ ოკუპირებული საქართველოს ტერიტორიების, აფხაზეთისა და სამხრეთ ოსეთის ადმინისტრაციული გამყოფი ხაზის გასწვრივ", — აცხადებს საელჩო.