დაავადებათა კონტროლის ეროვნული ცენტრის წარმომადგენლების რეკომენდაცია კვლავ ფეხით გადაადგილებაა. ასე უპასუხეს მათ დღევანდელ პრესკონფერენციაზე კითხვას, რომელი ტრანსპორტით სჯობს მგზავრობა — ავტობუსით, მიკროავტობუსით თუ მეტროთი.

"სჯობს ფეხით და დავუთმოთ ტრანსპორტი მათ, ვისაც ის მართლა აუცილებლად სჭირდება, რათა ნაკლები იყოს ტრანსპორტზე დაწოლა, ჩვენს იმ თანამოქალაქეებს, რომლებიც გადაადგილდებიან შორ დისტანციებზე, სჯობს მათ დავუთმოთ ტრანსპორტი", — თქვა პაატა იმნაძემ.

მან ასევე დააზუსტა, რომ ჩამოთვლილი საზოგადოებრივი ტრანსპორტიდან მგზავრობა უმჯობესია იმით, სადაც ყველაზე ნაკლები ხალხი იქნება.

ამასთან, NCDC-ის წარმომადგენლებმა რეკომენდაცია გასცეს ველოსიპედებით, მოპედებით და სხვა ღია ტრანსპორტით გადაადგილებაზეც.

ქალაქებს შიგნით საზოგადოებრივი ტრანსპორტი ხვალ, 29 მაისს განაახლებს მუშაობას, საქალაქთაშორისო კი — 8 ივნისიდან.