ირმა ინაშვილმა და პატრიოტთა ალიანსმა საქართველოს მთავრობის შემადგენლობას მხარი არ დაუჭირა და სხდომა კენჭისყრამდე დატოვა.

გუშინდელ საპარლამენტო სხდომაზე ირმა ინაშვილმა გიორგი კვირიკაშვილს მიმართა და უთხრა, რომ მისგან განსხვავებით, ის ადამიანებს ღვაწლს უფასებდა.

პატრიოტთა ალიანსის ლიდერმა აღნიშნა, რომ მის ტელევიზია ობიექტივს დიდი წვლილი აქვს შეტანილი "ქვეყნის გადარჩენაში". ამის შემდეგ, ინაშვილმა კვირიკაშვილს უთხრა, რომ თუ სტრატეგიული პარტნიორობა მათთან არ სურს ქართულ ოცნებას, მაშინ მას შეუძლია ეს საქმე ნაციონალური მოძრაობასთან "გააგრძელოს":

"თქვენ გითქვამთ, რომ სტრატეგიულ პარტნიორობას არ აპირებთ პატრიოტთა ალიანსთან. ოდესმე გთხოვეთ სტრატეგიული პარტნიორობა? აგერ გყავთ სტრატეგიული პარტნიორი გიგა ბოკერიას სახით და გააგრძელეთ სტრატეგიული პარტნიორობა გიგა ბოკერიასთან და დავით ბაქრაძესთან, ეს თქვენ გადასარევად გამოგდით. ირმა ინაშვილი და საქართველოს პატრიოტები ვყოფილვართ ამ ქვეყნის დამაზიანებლები, აღმშენებლები კი აგერ გყავთ ნაციონალური მოძრაობის სახით და მოიხმარეთ სიკეთეში".

ამ სიტყვის შემდეგ, ირმა ინაშვილმა ტრიბუნა დატოვა, თუმცა ცოტა ხანში დაბრუნდა და განაცხადა, რომ პატრიოტთა ალიანსი მთავრობის შემადგენლობას მხარს არ უჭერს. ამის შემდეგ, ინაშვილმა თავისი პარტიის წევრებს სხდომის დატოვებისკენ მოუწოდა.

გუშინ პარლამენტმა მთავრობის ახალ შემადგენლობას 110 ხმით ნდობა გამოუცხადა. დღეს კი საქართველოს პრეზიდენტმა გიორგი კვირიკაშვილი პრემიერმინისტრად დანიშნა.