ნაციონალური მოძრაობის დეპუტატი, თინა ბოკუჩავა ამბობს, რომ პანდემიასთან ბრძოლის პერიოდში არ იყო საჭირო ტყის კოდექსის დაჩქარებულად დამტკიცება. ბოკუჩავა აღნიშნავს იმასაც, რომ ეს ბადებს ეჭვებს კანონის წინასაარჩევნოდ მიღებაზე.

ბოიკოტის რეჟიმიდან გამომდინარე, ნაციონალური მოძრაობა ტყის კოდექსის განხილვებს არ ესწრებოდა და არც კენჭისყრაში მიუღიათ მონაწილეობა.

"დადასტურებულად შემიძლია გითხრათ, ჩვენი ერთობლივი პოზიცია არის, რომ ამ ეტაპზე ამ კანონპროექტის განხილვის აუცილებლობა, განსაკუთრებით დაჩქარებული წესით, ნამდვილად არ იყო. ახლა ეპიდგამოწვევიდან გამომდინარე პრობლემებზე უნდა ზრუნავდეს უპირველეს ყოვლისა საპარლამენტო უმრავლესობა. კონკრეტული კითხვები რჩება, ხომ არ მოხდა ამ კანონპროექტის წინასაარჩევნო მოცემულობებიდან გამომდინარე მიღება.

ეს არ იყო ის დრო და მომენტი, როცა მთავარი საკანონმდებლო ორგანო უნდა იღებდეს ამ კანონს. ტყის კოდექსზე მუშაობა მრავალი წელია მიმდინარეობს, ახლა ეს კანონი რატომ მიიღეს, თანაც დაჩქარებული წესით, რა თქმა უნდა, ბადებს კითხვებს, რომელიც მხოლოდ ჩვენ არ გაგვაჩნია", — ამბობს თინა ბოკუჩავა.

საქართველოს პარლამენტმა დღეს დაამტკიცა ტყის კოდექსი, რომელიც, მათ შორის, ითვალისწინებს იმას, რომ საპატრიარქოს საკუთრებაში შეიძლება გადაეცეს საქართველოში არსებული ყველა ეკლესია-მონასტრის მიმდებარე ტყის ფართობი, არაუმეტეს 20 ჰექტრისა თითოეულის შემთხვევაში.