დაავადებათა კონტროლის ცენტრის დირექტორი ამირან გამყრელიძის თქმით, საკოორდინაციო საბჭოზე ელიავასა და სხვა ღია ბაზრობების გახსნათან დაკავშირებით მსჯელობა მიმდინარეობს. გამყრელიძემ აღნიშნა, რომ ამ საკითხზე ზუსტ თარიღს ვერ დააკონკრეტებს

"რაც შეეხება ელიავასა და ღია ბაზრობებს, ამაზე მიმდინარეობს მსჯელობა საკოორდინაციო საბჭოზე და მიიღება გადაწყვეტილება. ეკონომიკის გახსნის პროცესი დაწყებულია, მაგრამ ეს უნდა იყოს ძალიან ფრთხილი და ნაბიჯ-ნაბიჯ", — თქვა ამირან გამყრელიძემ.

სავაჭრო ცენტრებისა და იქ განთავსებული მაღაზიების გახსნაზე მთავრობას გადაწყვეტილება ჯერ არ მიუღია.

რა გაიხსნა აქამდე

შეგახსენებთ, რომ შეზღუდვების ნაწილი მოიხსნა აქამდეც. კერძოდ:

  • 11 მაისიდან გაიხსნა ჩაკეტილი თბილისი;
  • 11 მაისიდანვე, ქვეყნის მასშტაბით გაიხსნა ყველა სახის წარმოება და ყველა სახის საცალო და საბითუმო მაღაზია, რომელსაც აქვს შესასვლელი ქუჩიდან. შეზღუდვები კვლავ ეხება ტანსაცმლის/ფეხსაცმლის მაღაზიებსა და სავაჭრო მოლებს;
  • აღდგა სარეკრეაციო ზონების ფუნქციონირება;
  • ისევ მუშაობს ავტოსამრეცხაოები/ავტოსერვისები;
  • უკვე შესაძლებელია კომპიუტერის, პირადი და საყოფაცხოვრებო საქონლის რემონტი;
  • დაშვებულია სამშენებლო მასალების წარმოება, მშენებლობა და სამშენებლო ზედამხედველობასთან დაკავშირებული საქმიანობა.
  • დასაშვები გახდა მსუბუქი ავტომობილებით გადაადგილება და ტაქსების ოპერირება;
  • ამოქმედდა ონლაინ ვაჭრობა;
  • შესაძლებელი გახდა ნებისმიერ პროდუქტზე მიტანის სერვისით სარგებლობა;
  • გაიხსნა ღია ტიპის აგრარული ბაზრების ნაწილი;
  • 14 მაისიდან გაიხსნა მოძრაობა რუსთავსა და გარდაბანში;
  • 18 მაისიდან გაიხსნა სილამაზის სალონები და ესთეტიკური ცენტრები;
  • 18 მაისიდან მოიხსნა 3 ადამიანზე მეტის შეკრების შეზღუდვა ღია და დახურულ სივრცეეებში;
  • მარნეულში საკარანტინე ზონა მოიხსნა.