ჯანდაცვის კომიტეტის თავმჯდომარის, დიმიტრი ხუნდაძის განცხადებით, საგანგებო მდგომარეობის გამოცხადების გარეშე შეზღუდვების შესახებ კანონპროექტი ომბუდსმენთან განიხილეს და მისი შენიშვნები გაითვალისწინეს.

ხუნდაძის თქმით, სახეცვლილ კანონპროექტს 22 მაისის საკოორდინაციო საბჭოზეც განიხილავენ:

"გუშინდელი სასესიო განხილვის შემდეგ გვქონდა კომუნიკაცია სახალხო დამცველთან, მისი რეკომენდაციების უდიდესი ნაწილი გათვალისწინებულია, ჩაშლილია ყველა ის დეტალი, სადაც კითხვის ნიშნები იყო და გამოითქვა პრეტენზიები. წარმოდგენილია სახეცვლილი და დაზუსტებული ვარიანტი", — თქვა ქართული ოცნების დეპუტატმა.

საბჭოს სხდომა მთავრობის ადმინისტრაციაში ამ წუთებში მიმდინარეობს. სწორედ აქ უნდა გადაწყდეს, კანონის მოქმედების ვადა.

გუშინ შეცვლილი დოკუმენტის მიხედვით, კანონი, რომელიც მთავრობას საშუალებას აძლევს შეზღუდვები საგანგებო მდგომარეობის გამოცხადების გარეშე დააწესოს, დროებითი იქნება. ირაკლი კობახიძემ თავდაპირველად 15 ივლისი ახსენა, შემდეგ კი თქვა, რომ კანონი საჭიროა ივლისის ჩათვლით. ჯერ უცნობია, რა ვადას გადაწყვეტს მთავრობა.

დაგეგმილი ცვლილებების მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც. ინიციატივას პროტესტი მოჰყვა როგორც ოპოზიციაში, ისე სამოქალაქო საზოგადოებაში. ისინი კანონპროექტში გამოხატვის თავისუფლების შეზღუდვის საფრთხეს ხედავენ. ხმაურიანი განხილვების შემდეგ, ქართულმა ოცნებამ გადაწყვიტა კანონი იყოს დროებითი. ინიციატივას ამ დათქმით მეორე და მესამე მოსმენით პარლამენტში კენჭს დღეს უყრიან.