ერთიანი ნაციონალური მოძრაობა საბანკო შეღავათების კიდევ სამი თვით გახანგრძლივებას ითხოვს. როგორც პარტიის პოლიტსაბჭოს თავმჯდომარე ნიკა მელია ამბობს, "ყოველი 10 მოქალაქიდან 7-ს ბანკის ვალი აქვს, ქვეყანაში კი ეკონომიკა გაჩერებულია", ამიტომ ხელისუფლებამ ხალხი ამ გადასახადებიდან მაინც უნდა გაათავისუფლოს.

"ძალიან სამწუხაროა იმ ყველაფრის ხილვა, რასაც უკანასკნელი დღეები ვაკვირდებით. ხელისუფლება საერთოდ აღარ ჩანს. თუ აქამდე იყო იმიტაცია, რომ პროცესებს მართავდნენ, დღეს საერთოდ დაიკარგნენ.

ივნისში იწურება ის 3 თვე, რომლის განმავლობაშიც ბანკებს საშეღავათო პერიოდი ჰქონდათ დაწესებული. შესაბამისად, გაჩნდება გაზრდილი პროცენტების გადახდის ვალდებულება. ეს ნიშნავს, რომ მოქალაქეების წინააღმდეგ, რომლებმაც დაკარგეს სამსახურები და ყოველგვარი შემოსავლის გარეშე არიან დარჩენილები, იძულებითი აღსრულება დაიწყება.

საერთაშორისო პარტნიორებისა და სავალუტო ფონდების დახმარებით, ჩვენ საბანკო სექტორისთვის მილიარდ-ნახევარი დოლარი მოვიზიდეთ, ეს გვაძლევს საშუალებას გაგრძელდეს საშეღავათო პერიოდი. ამიტომ, მოვუწოდებ ხელისუფლებას, კიდევ 3 თვით გადავადდეს საკრედიტო შენატანების პერიოდი. დარწმუნებული ვარ ამ მოწოდებაში სრულიად საქართველო ერთიანი იქნება", — თქვა ნიკა მელიამ.

მთავრობამ და საბანკო სექტორმა სესხების გადავადების შესახებ ერთობლივი გადაწყვეტილება მარტში, კორონავირუსის პანდემიის გამო მიიღეს. ამ შეღავათის მიხედვით, საქართველოს ყველა მოქალაქე, ვისაც ამის სურვილი ჰქონდა, სამი თვის განმავლობაში, მარტიდან მაისის ჩათვლით, სასესხო მომსახურებისგან თავისუფლდებოდა.