ჯანდაცვის მინისტრის, ეკატერინე ტიკარაძის თქმით, ტესტები, რომლებიც სახელმწიფოს უნდა ნიდერლანდური კომპანიისგან უნდა ეყიდა, მაგრამ ჩინური აღმოჩნდა, მთელი მსოფლიოს გამოწვევაა. ამ თემაზე მან ღია ეთერში ისაუბრა.

"მხოლოდ საქართველო არ ყიდულობს ტესტებს, რომლებიც არის დარეგისტრირებული სათაო ოფისში სხვა ქვეყანაში, მაგრამ მწარმოებელი არის ჩინეთი. ჩვენთვის ცნობილია, რომ არა მხოლოდ ტესტების მხრივ, არამედ სხვა დანადგარებისა თუ ინსტრუმენტების კუთხითაც, ხშირია შემთხვევები, როდესაც სათაო ოფისი არის ევროპის რომელიმე ქვეყანაში ან ამერიკის კონტინენტზე, ხოლო მწარმოებელი ქვეყანა არის ჩინეთი. აქედან გამომდინარე, მე ვთვლი, რომ ეს არ უნდა იყოს გასაკვირი მოვლენა", — თქვა ეკატერინე ტიკარაძემ.

მისი თქმით, სამინისტროს აღნიშნული ტესტები არ შეუძენია. ტიკარაძემ აღნიშნა, რომ მთავრობის გადადგმული ნაბიჯები კრიტიკას არ საჭიროებს და ხაზს უსვამს, რომ სამინისტროსთვის პროდუქტის ხარისხი მნიშვნელოვანია.

ტესტების გარშემო ახალი კითხვები მას შემდეგ გაჩნდა, რაც აღმოჩნდა, რომ საქართველოს მთავრობის მიერ შეძენილი "ნიდერლანდებში დამზადებული" 30 000 სწრაფი ტესტი ჩინეთშია წარმოებული.

OCCRP-სა და ნიდერლანდური პლატფორმა Investico-ს ჟურნალისტური გამოძიების მიხედვით, კომპანია Inzek International Trading ყიდდა ანტისხეულების სწრაფ ტესტს სახელმწოდებით Biozek, რომელზეც "ნიდერლანდებში დამზადებული ეწერა და სინამდვილეში, ჩინეთშია წარმოებული.

ამ გამოძიებასა და იმაზე, რომ ამავე კომპაანისგან საქართველომ ათეულობით ათასი ტესტი შეისყიდა, გამოცემა OC Media წერს. მათი ცნობით, საქართველოს მთავრობის მიერ შეძენილია 930 000 ლარის ($290 000) ღირებულების "ნიდერლანდური წარმოების" ანტისხეულების 30 ათასი ტესტი.

ამავე გამოცემის ინფორმაციით, მანამდე, 15 აპრილს Biozek-ის 5 000 ტესტი საქართველოს მთავრობას თიბისი ბანკმა აჩუქა. შემდეგ კი ჯანდაცვის სამინისტრომ ტესტები პირდაპირი შესყიდვის წესით, სამედიცინო იმპორტიორ სოლმარტისგან შეიძინა. დოკუმენტი 24 აპრილით თარიღდება.