ევრონესტის საპარლამენტო ასამბლეაში ევროპარლამენტის დელეგაციის თავმჯდომარის, ანდრიუს კუბილიუსის, განცხადებით, ის დახმარება, რომელსაც საქართველო პანდემიასთან გასამკლავებლად იღებს დაკავშირებულია დემოკრატიულ პროცესებთან, რომელიც მთავრობამ უნდა აჩვენოს. მათ შორის ევროპარლამენტარი აღნიშნავს მთავრობის მიერ ნაკისრი ვალდებულებების შესრულებას.

კუბილიუსი წერს, რომ საქართველო ევროკავშირისგან და მისი პარტნიორებისგან დახმარების სახით 500 მილიონ ევროზე მეტს მიიღებს. მისი თქმით, ევროკავშირი საქართველოსა და აღმოსავლეთ პარტნიორობის ქვეყნების დახმარებას აგრძელებ, რომ მათ სოციალური და ეკონომიკური კრიზისის დაძლევა მოახერხონ. მისი თქმით, პანდემიისგან ეკონომიკაზე დარტყმის დაძლევის ერთადერთი გზა "ევროპული სოლიდარობაა".

"ჩვენ ყველამ ერთად უნდა ვიმუშაოთ ურთიერთნდობის ატმოსფეროში, რათა დავიცვათ დემოკრატია და მივაღწიოთ ამ მიზნებს. ამ ნდობის მიღწევა მხოლოდ წინამდებარე ვალდებულებისა და დაპირებების შესრულების პროგრესირებას შეუძლია, მათ შორის, 2020 წლის 8 მარტს მიღწეული შეთანხმების შესრულებას, რომელიც მიღწეულ იქნა საქართველოს ყველა მთავარ პოლიტიკურ პარტიას შორის", — აღნიშნავს კუბილიუსი.

კუბილიუსი აღნიშნავს, რომ საქართველოს ევროკავშირში ინტეგრაციის საკითხი დაკავშირებულია იმასთან, თუ რამდენად აჩვენებს მთავრობა დემოკრატიის მშენებლობის პროცესს.

"დარწმუნებულები ვართ, რომ ევროკავშირი დღესაც ბევრს აკეთებს და ხვალ უფრო მეტს გააკეთებს, რომ დაეხმაროს საქართველოს და მის ხალხს. ვიმედოვნებ, რომ ერთ დღეს საქართველო მზად იქნება, რომ ევროკავშირის წევრი გახდეს" — წერია განცხადებაში.

კუბილიუსი აღნიშნავს, რომ ოპოზიციასთან 8 მარტს მიღებული შეთანხმების შესრულება მნიშვნელოვანია, რათა მთავრობას ჰქონდეს მოახლოებულ არჩევნებზე საზოგადოებისა და საერთაშორისო პარტნიორების ნდობა.