სამოქალაქო მოძრაობა სირცხვილია არჩილ თალაკვაძის მიერ ბოლო დღეებში გაკეთებულ განცხადებებს ეხმაურება და მას სამარცხვინოს უწოდებს. მათი თქმით, თალაკვაძის მიერ დღეს გამართული ბრიფინგი, რომელიც 8 მარტის შეთანამხებას ეხებოდა სამარცხვინო იყო.

მათი თქმით, შეთანხმების ტექსტში ნათქვამია, რომ სასამართლო პოლიტიკური მიზნებით არ უნდა იყოს გამოყენებული, მაგრამ მმართველი პარტიის ინტერპრეტაციით, ეს არა ხელისუფლების, არამედ ოპოზიციის შესასრულებელი ვალდებულებაა.

"წინა ხელისუფლებისგან მემკვიდრეობით მიღებული, პოლიტიზირებული პროკურატურისა და სასამართლოს დამოუკიდებლობაზე აპელირება ქართული ოცნების სტანდარტითაც კი გაუგონარი უტიფრობაა და ამაზე არ დავწვრილმანდებით. არაერთი ავტორიტეტული საერთაშორისო უფლებადამცველი ორგანიზაციისა და სახალხო დამცველის დეტალური ანგარიშები საპირისპიროს მეტყველებენ", — აცხადებს სირცხვილია.

მათი თქმით, საქართველოს ფარგლებში კრიტიკის მიმართ "უტიფარ პასუხებს" ხელისუფლებისგან უკვე მიეჩვივნენ, მაგრამ დღეს, პარლამენტის კიდევ უფრო შორს წავიდა და ევროპარლამენტარი ანდრიუს კუბილიუსის შეურაცხყოფაც გაბედა.

"ანდრიუს კუბილიუსის შეურაცხყოფით ქართული ოცნება ცდილობს, ქართველი ხალხის რეფერენდუმით განმტკიცებული ურყევი ნების, ევროინტეგრაციის გზაზე ახალი დაბრკოლებები გააჩინოს. ბოტებისა და ტროლების ქარხნების გათავისების შემდეგ, ხელისუფლება აგრძელებს კრემლისგან ნასწავლი პოლიტ-ტექნოლოგიური მეთოდებით ოპერირებას და საზოგადოების პოლარიზაციაზე მიმართულ ურთიერთგამომრიცხავ პოლიტიკურ მესიჯებსა და ნაბიჯებს", — აცხადებენ მოძრაობაში.

პარლამენტის თავმჯდომარემ, არჩილ თალაკვაძემ, ევროპარლამენტარ, ანდრიუს კუბილიუსის კრიტიკულ წერილს წერილით უპასუხა და ევროპელი პოლიტიკოსის წერილის შინაარსზე შეშფოთება გამოთქვა.

როგორც თალაკვაძე წერს, საქართველოს სასამართლოებს პოლიტიკური პარტიები ვერ უბრძანებენ და ვერ მართავენ და ამიტომ, ევრონესტის საპარლამენტო ასამბლეის თანათავმჯდომარის მხრიდან ვითარების ამგვარი ხედვა მოულოდნელია.