ქართული ოცნების ერთ-ერთი ლიდერი, ირაკლი კობახიძე არ გამორიცხავს, რომ უკრაინაში ზურაბ ადეიშვილს გენერალური პროკურორის მრჩევლის პოზიცია არ უჭირას. ამის შესახებ მან ჟურნალისტებთან განაცხადა.

"ინფორმაცია არ გვქონდა და დღესაც არ ვიცით, რამდენად სწორია ეს. თქვენ უსმენთ ხოლმე სააკაშვილს და ის ყოველ წინადადებაში იტყუება. ამიტომ დიდი შანსია, რომ ესეც ტყუილი იყოს, მაგრამ დაზუსტება ყველაფერს სჭირდება", — განაცხადა კობახიძემ.

საქართველოს ექსპრეზიდენტისა და უკრაინის რეფორმების საბჭოს თავმჯდომარის, მიხეილ სააკაშვილის განცხადებით, საქართველოს იუსტიციის ყოფილი მინისტრი, ზურაბ ადეიშვილი უკრაინის გენერალური პროკურორის მთავარი მრჩეველია.

ზურაბ ადეიშვილს ე.წ. ცხრაწლიანი რეჟიმის ერთ-ერთ მთავარ პირად განიხილავენ. წინა ხელისუფლების დროს ის სხვადასხვა დროს იყო გენერალური პროკურორი და იუსტიციის მინისტრი.

2017 წელს ზურაბ ადეიშვილი ვანო მერაბიშვილთან ერთად აკურას ღვინის ქარხნის ჩამორთმევის საქმეზე დამნაშავედ სცნეს და 2 წლით თავისუფლების აღკვეთა მიესაჯა. ამნისტიის შესახებ საქართველოს კანონის გამოყენებით საბოლოოდ განესაზღვრა 1 წლით და 6 თვის ვადით თავისუფლების აღკვეთა. ადეიშვილი ქვეაყანში არ იმყოფება და მას სასჯელი არ მოუხდია.

ასევე, ადეიშვილი დამნაშავედ ცნეს ტელეკომპანია იბერიას სამაუწყებლო ლიცენზიის საქმეზე. ადეიშვილს სასჯელის სახედ 2-წლიანი პატიმრობა მიესაჯა, რაც ამნისტიის კანონით 1/4-ით შეუმცირდა და ჯამში 1.6 წელი განესაზღვრა.