ბობ დილანი ბოლო რვა წლის განმავლობაში პირველად გამოუშვებს ახალ ალბომს, რომელშიც სრულიად ახალი და ორიგინალი სიმღერები იქნება შესული.

გასულ წლებში ცნობილმა მუსიკოსმა სამი ალბომი — Shadows in the Night (2015), Fallen Angels (2016) და Triplicate (2017) — გამოუშვა, რომლებშიც ქავერ ვერსიები იყო შესული. ორიგინალი სიმღერების ჩანაწერი მან ბოლოს 2012 წელს გამოუშვა — Tempest.

ახალი ალბომის სახელწოდება Rough and Rowdy Ways იქნება და მისი შეძენა 19 ივნისიდან იქნება შესაძლებელი.

მარტში ბობ დილანმა სწორედ ამ თავისი ახალი ალბომიდან პირველი სიმღერა გაავრცელა, რომელიც კენედის მკვლელობას ეძღვნება და 17 წუთის ხანგრძლივობით ყველაზე გრძელი სიმღერაა მის შემოქმედებაში.

სულ ცოტა ხნის წინ კი, 7 მაისს მისი კიდევ ერთი ახალი სიმღერა გამოჩნდა YouTube-ზე:

ლიტერატურის დარგში ნობელის პრემიის ამ ცნობილ ლაურეატს აპრილში მუსიკალური ტურნე ჰქონდა დაგეგმილი, თუმცა შექმნილი მდგომარეობის გამო მისი გაუქმება მოუწია. ამის მიუხედავად კი, ბობ დილანი მაინც ახერხებს, რომ თავისი ერთგული მსმენელები გაახაროს და ახალი კომპოზიციებით იზოლაციაშიც გაანებივროს.