პანდემიის დროს ოჯახში ძალადობის შემთხვევები დრამატულად იზრდება. ამის შესახებ მსოფლიო ჯანდაცვის ორგანიზაციის ევროპის ბიუროს ხელმძღვანელმა, ჰანს კლიუგემ განაცხადა. ორგანიზაცია მოუწოდებს ადგილობრივ და ეროვნულ მთავრობებს, არ გააჩერონ სოციალური სამსახურები, რათა შესაძლებელი დარჩეს მსხვერპლების დახმარება:

"აპრილში, წინა წელთან შედარებით, ევროკავშირის წევრ ქვეყნებში 60 პროცენტით გაიზარდა ქალების მიერ საგანგებო სამსახურში შესული ზარების ოდენობა. ყველა მათგანი ინტიმური პარტნიორის მხრიდან ძალადობაზე მიუთითებდა".

მსოფლიო ჯანდაცვის ორგანიზაცია აღნიშნავს რომ ამ მხრივ რთული ვითარებაა ბელგიაში, საფრანგეთში, ირლანდიაში, რუსეთში, ესპანეთში, დიდ ბრიტანეთში.

უკვე სამი თვეა კორონავირუსის პანდემია გრძელდება ევროპის რეგიონში. WHO-ს მონაცემებით, 1,6 მილიონი ინფიცირებულითა და 150 ათასამდე გარდაცვლილით, ევროპის რეგიონში დადასტურებული შემთხვევების 45 პროცენტი ირიცხება.