პრემიერმინისტრის, გიორგი გახარიას განცხადებით, ტურიზმის გახსნასთან ერთად საქართველომ საზღვრებზე თითოეული შემომსვლელის კონტროლი უნდა გააძლიეროს. ამ თემაზე მან მთავრობის ბრიფინგზე ისაუბრა. გახარიამ აღნიშნა, რომ საზღვარზე ადამიანის შემოწმებისთვის 1 საათი საკმარისი უნდა იყოს.

"ჯანდაცვის სამინისტროს უკვე აქვს მიღებული დავალებები, რომ საზღვრებზე უნდა გაძლიერდეს კონტროლი თითოეული შემომსვლელი ადამიანის. თუ აქამდე გვჭირდებოდა 14-დღიანი კარანტინი, 24 საათიანი კარანტინი 1 საათში უნდა იყოს დასრულებული. ამის შესაძლებლობები და ტექნოლოგიები არსებობს და ჯანდაცვის სამინისტრო ამ ამოცანას გადაწყვეტს უახლოეს მომავალში", — თქვა გიორგი გახარიამ.

პრემიერის თქმით, აუცილებელია რამოდენიმე კრიტიკულად მნიშვნელოვანი "კონტროლის წერტილი", პირველ რიგში, კი ეს სახმელეთო და საჰაერო საზღვარი იქნება.

დღეს, 7 მაისს მთავრობამ ანტიკრიზისული გეგმის კიდევ ერთი ეტაპი წარადგინა, რომლის მიხედვითაც შეზღუდვების ნაწილი უფრო ადრე მოიხსნება. მაგალითად, 11 მაისიდან მოძრაობა აღდგება თბილისში, 14 მაისიდან რუსთავსა და გარდაბანში, ხოლო 18 მაისიდან სრულად გაიხსნება მარნეული.

გახარიას თქმით, 15 ივნისიდან ამოქმედდება შიდა ტურიზმი, 1 ივნისიდან კი საქართველო უცხოელი ტურისტების მისაღებად მზად იქნება.

გაიგეთ მეტი: