გრაფიტის ცნობილ მხატვარ ბენქსის ძირითადად სასაცილო ან კრიტიკული ნამუშევრებით იცნობენ, თუმცა ამჯერად მან გადაწყვიტა პანდემიისას დაუღალავად მშრომელი სამედიცინო პერსონალისთვის მადლობა გადაეხადა.

ახალ ნახატზე გამოსახულია პატარა ბიჭი, რომელიც მედდის უნიფორმიანი ფიგურით თამაშობს: მას პირბადესთან ერთად სუპერგმირის მოსასხამიც აქვს.

ნახატზე ასევე გამოსახულია კალათაში ჩაყრილი კომიქსის ცნობილი სუპერგმირების თოჯინები — ბეტმენი და ადამიანი-ობობა. როგორც ჩანს, მოზარდი ახალი გმირით უფრო მეტადაა დაინტერესებული, ვიდრე იმ ორით.

View this post on Instagram

. . Game Changer

A post shared by Banksy (@banksy) on

როგორც BBC გვამცნობს, ეს ერთი მეტრის დიამეტრის ნახატი ბენქსიმ დროებით ინგლისის ერთ-ერთ კლინიკას გადასცა ამ წარწერით:

"მადლობა ყველაფრისთვის. იმედია, გარემოს მცირედით მაინც გაგიფერადებთ, მიუხედავად იმისა, რომ ის შავ-თეთრია".

ნახატი საავადმყოფოში შემოდგომამდე იქნება წარმოდგენილი, შემდეგ კი აუქციონზე გაიყიდება, შემოსული თანხა კი პანდემიასთან ბრძოლის საქველმოქმედო ფონდს გადაერიცხება.

ეს პირველი ნახატი არ არის, რომელიც ამ ანონიმურმა ბრიტანელმა ხელოვანმა პანდემიის დროს შექმნა: მანამდე იზოლაციაში ვირთხების მიერ გამოწვეული ქაოსი ასახა თავისებურად.