Freedom House-ის ახალ ანგარიშში, (Dropping the Democratic Facade / "დემოკრატიის ფასადის ჩამოგდება"), საქართველო ისევ ჰიბრიდული დემოკრატიის ქვეყანაა, თუმცა შარშანდელთან შედარებით დემოკრატიის განმსაზღვრელი ქულა, 3,29-დან 3,25-მდე შემცირდა. ანგარიშში წერია, რომ კლება სასამართლოს დამოუკიდებლობის სფეროს უკავშირდება. ქვეყნების სარეიტინგო ქულა 1-დან 7-მდეა, რაც ნიშნავს, რომ 7-ქულიანი ქვეყანა დემოკრატიის უმაღლეს დონეს აჩვენებს, ხოლო 1-ქულიანი — ყველაზე დაბალს:

"[საქართველოში] სასამართლოს დამოუკიდებლობის ქულა შემცირდა 3-დან 2,75-მდე, უზენაეს სასამართლოში ახალი მოსამართლეების სადავო დანიშვნისა და 2019 წლის ივნისის აქციების დასაშლელად პოლიციიის მიერ ძალის არაპროპორციულად გამოყენების გამო".

ფოტო: Freedom House

ანგარიშში მიმოხილულია დემოკრატიის ხარისხის მხრივ სხვადასხვა ქვეყანაში არსებული მდგომარეობა:

"თუკი პოლონეთი თავის კურსს გააგრძელებს, იგი შეუერთდება ჰიბრიდულ, ან ავტორიტარული რეჟიმების ქვეყნების რიგს, სადაც პოლიტიზებული მართლმსაჯულება ჩვეულებრივი მოვლენაა. ბოლო პერიოდში საქართველოში განვითარებული მოვლენები, ის შემაშფოთებელი მაგალითებია, თუ როგორი შეიძლება იყოს ეს [პოლიტიზებული მართლმსაჯულება]. მაშინ, როდესაც სასამართლო სისტემა საქართველოს პოლარიზებული პოლიტიკის მთავარი ნაწილია, 2019 წელსა და 2020 წლის დასაწყისში, არაერთმა განურჩეველმა დაპატიმრებამ და სასამართლო საქმემ კიდევ უფრო გაამწვავა ისედაც დაძაბული სიტუაცია".

Freedom House-ს მაგალითად მოყავს ბიზნესმენ მამუკა ხაზარაძის პოლიტიკაში გამოჩენა, რომელიც ფულის გათეთრებაშია ბრალდებული. ორგანიზაცია წერს, რომ მას შემდეგ, რაც ხაზარაძემ განაცხადი გააკეთა პოლიტიკური მოძრაობის ჩამოყალიბებაზე, მას ბრალი წაუყენეს. გარდა ამისა, ანგარიშში ნათქვამია, რომ უფრო "გამოცდილი პოლიტიკური ლიდერი" [გიგი უგულავა] 38 თვით დააპატიმრეს, სახელმწიფო სახსრების ბოროტად გამოყენების ბრალდებით, განმეორებით წარმოებულ საქმეზე.

"ნიშნად იმისა, რომ ასეთი შემთხვევები მხოლოდ ქვედა ინსტანციებში არ მოხდება, მმართველმა უმრავლესობამ 14 ახალი მოსამართლე მიავლინა საქართველოს უზენაეს სასამართლოში უვადოდ, "უაღრესად არასწორი და არაპროფესიონალური" დანიშვნის პროცედურების შემდეგ", — წერს Freedom House.

ფოტო: Freedom House