საქართველოს წიგნის გამომცემელთა და გამავრცელებელთა ასოციაციამ მთავრობას ქართული წიგნის ბაზრის გადარჩენის ანტიკრიზისული გეგმით მიმართა.

ასოციაციის ინფორმაციით, ბოლო თვე-ნახევრის განმავლობაში წიგნის სექტორს 6 მილიონი ლარის ზარალი მიადგა, რაც მათი თქმით, სექტორისთვის "ძალიან საშიში ციფრებია". მათივე პროგნოზით, მაისის თვის პროგნოზით, ერთი თვის თავზე აღნიშნული თანხა გაორმაგდება და დაახლოებით 12 მილიონ ლარს შეადგენს.

მათივე თქმით, მიუხედავად იმისა, რომ 27 აპრილიდან ონლაინ ვაჭრობა საქართველოში ოფიციალურად აღდგა, დღემდე გამომცემელთა უმრავლესობა გაურკვევლობაშია და მათთვის ონლაინ ვაჭრობის აღდგენის ნებართვასთან დაკავშირებული პროცედურები კვლავაც ბუნდოვანია.

საგამომცემლო სექტორისა და ქართული წიგნის გადარჩენის მიზნით, წიგნის გამომცემელთა და გამავრცელებელთა ასოციაციამ სექტორის დასახმარებლად 9-პუნქტიანი ანტიკრიზისულ გეგმა შეიმუშავა, რაც გულისხმობს:

  • 6 თვის განმავლობაში გამომცემლებისა და წიგნის გამავრცელებლების სრულად განთავისუფლებას საშემოსავლო გადასახადისგან;
  • სახელმწიფოს შუამდგომლობას გრძელვადიან უპროცენტო სესხზე საგამომცემლო სექტორის წარმომადგენლებისთვის;
  • მიმდინარე სესხებზე პროცენტის შემცირებასა და ხანგრძლივ საშეღავათო პერიოდებს;
  • მცირე გრანტების დაწესებას პატარა გამომცემლობებისთვის 2000-5000 ლარის ოდენობით;
  • ბიბლიოთეკების წიგნადი ფონდების განახლების პროექტს – სახელმწიფოს მხრიდან დაფინანსების გაზრდას;
  • თბილისის წიგნის საერთაშრისო ფესტივალისთვის დაფინანსების გაზრდას სახელმწიფოს მხრიდან, მონაწილეთა საიჯარო ქირის ერთჯერადად შემცირების მიზნით;
  • საქართველოს მწერალთა სახლის მთარგმნელობითი გრანტის ხელმეორედ გამოცხადებას;
  • ქართველი ავტორების ხელშეწყობასა და განათლების გავრცელებას სპეციფიკურ ჯგუფებში;
  • სასკოლო სახელმძღვანელოების გამომცემლების მხარდაჭერას.

წაიგნის გამომცემელთა და გამავრცელებელთა ასოციაცია იმედოვნებს, რომ მათ მიერ შემუშავებული გეგმა გათვალისწინებული იქნება "ქართული კულტურის გადარჩენის იმ საერთო სტრატეგიაში, რომელზეც განათლების, მეცნიერების, კულტურისა და სპორტის სამინისტრო ალბათ, ამჟამად მუშაობს".