ჯანდაცვის მინისტრის, ეკატერინე ტიკარაძის თქმით, დაბალკონტინგენტიანი სამედიცინო დაწესებულებებიდან, სახელმწიფო დაფინანსება შეუწყდება ისეთებს, როგორიცაა ესთეტიკური ცენტრები. მინისტრმა თქვა, რომ გადაწყვეტილება ამაზე მიღებულია და მე-15 დადგენილება ამ მხრივ განხორციელდება.

ეკატერინე ტიკარაძემ განმარტა, რომ სხვა დაბალკონტინგენტიანი სამედიცინო დაწესებულებებზე კიდევ იმსჯელებენ, თუ სად არიან ისინი გეოგრაფიულად და ისინი დარჩებიან, როგორც სტრატეგიული ობიექტები.

"ჩვენ მივყვებით დადგენილებას. დღეს საღამოს 6 საათზე გაიმართება პირველადი ჯანდაცვის საბჭო ამ თემაზე, სადაც დამატებით ვიმსჯელებთ ისეთ ობიექტებზე, რომლებიც მდებარეობენ დაბებში. რა თქმა უნდა, ბენეფიციარებიდან გამომდინარე მათი რაოდენობა ვერ აღწევს 13 ათასს".

მინისტრმა აღნიშნა ისიც, რომ ამ პროცესში სამსახურის დაკარგვის რისკი დაბალი იქნება:

"საქართველოში არის ექიმების დეფიციტი, შესაბამისად, ექიმები და ეთნები რომლებიც ამ პროცესში იყვნენ, მათ მიმართ იქნება განხილვები დეტალური და პერსონალური, შესაბამისად, უმუშევრობის კომპონენტის რისკი დაბალია".

დღეს, 30 აპრილს ევროპული საქართველოს წევრმა, ზურაბ ჭიაბერაშვილმა მთავრობას მოუწოდა, შეაჩეროს მე-15 დადგენილების მოქმედება და ამავე დროს, მკაფიო გეგმა წარმოადგინოს, როგორ ანაზღაურდება ექიმებისა და ექთნების შრომა.

მისი განცხადებით, პირველი მაისიდან თბილისში, ბათუმსა და ქუთაისში იმ ამბულატორიებსა და პოლიკლინიკებს, რომელთა რეგისტრირებული კონტიგენტი 13 000-ზე ნაკლებია, სახელმწიფო დაფინანსების მიღება უწყდებათ.

როგორც ჭიაბერაშვილი ამბობს, კორონავირუსით გამოწვეული კრიზისის პირობებში ყოველი ექიმისა და ექთნის შრომა სასიცოცხლოდ მნიშვნელოვანია და სრულიად გაუმართლებელია ასეთი გადაწყვეტილებების არშეჩერება მაშინ, როდესაც მთავრობა, პირიქით, დაფინანსებას უნდა უზრდიდეს.