ოფიციალურად დადასტურდა, რომ კინოსტუდია Lionsgate ცნობილი თრილერის Now You See Me-ის მესამე ნაწილს გადაიღებს.

კომპანიამ ამ ცნობილი თრილერის ჟანრის ფილმების სერიის ახალი ფილმის სცენარის შესაქმნელად ერიკ უორენ სინგერი დაიქირავა, რომელსაც აქამდე ოსკარის 10 ნომინაციის მქონე ფილმ American Hustle-ის სცენარზე უმუშავია. სინგერი ასევე Top Gun: Maverick-ის სცენარისტია, რომლის გამოსვლასაც მაყურებლები მოუთმენლად ელიან.

Now You See Me-ის პირველი ორი ფილმი ძალიან წარმატებული პროექტი აღმოჩნდა კინოგაქირავებაში და მათმა მსოფლიო შემოსავლებმა $687 მილიონს მიაღწია. წინა ნაწილებში სამსახიობო გუნდი ჰოლივუდის ისეთი ვარსკვლავებით იყო დაკომპლექტებული, როგორებიც არიან ვუდი ჰარელსონი, ჯესი აიზენბერგი, ისლა ფიშერი, მორგან ფრიმენი და მარკ რუფალო.

ვუდი ჰარელსონი, ლიზი კაპლანი, ჯესი აიზენბერგი, დენიელ რედკლიფი და დეივ ფრანკო Now You See Me-ის მეორე ნაწილში (2016)

ფოტო: Lionsgate

ჯერჯერობით უცნობია, თუ ვინ იქნება მომავალი ფილმის სამსახიობო გუნდში, თუმცა დარწმუნებით შეგვიძლია ვთქვათ, რომ ერიკ უორენ სინგერი ამ ფრენჩაიზის სამყაროს ახალ პერსონაჟებს გაგვაცნობს და ასევე უკვე კარგად ნაცნობი გმირების ისტორიებსაც მოგვითხრობს.

"Now You See Me-ის ფილმები იმისთვის იქმნებოდა, რომ მაყურებლები მოულოდნელი სიუჟეტური ხრიკებით გაეოცებინა. ყველა ილუზიონისტმა იცის, რომ ერთი და იგივე ფოკუსი ბევრჯერ არ უნდა გამოიყენოს. სწორედ ამიტომაც ერიკ სინგერი და მისი ილუზიონისტების გუნდი ამ ახალ ფილმში რაღაც განსაკუთრებულს შემოგვთავაზებენ", — განაცხადა Lionsgate-ის წარმომადგენელმა, ნათან კაჰანემ.

ისღა დაგვრჩენია, ვიმედოვნოთ, რომ სცენარზე მუშაობა პანდემიის დასრულებამდე მორჩება, რათა შემდეგ ფილმის გადაღებაზე მუშაობა მაშინვე დაიწყონ და პრემიერაც რაც შეიძლება მალე შედგეს.