შვეიცარია კორონავირუსის გამო შეზღუდვების დაწესებიდან 6 კვირის შემდეგ მათ გამარტივებას იწყებს. ამის შესახებ ინფორმაციას CNN ავრცელებს.

მათივე ცნობით, შვეიცარიის ფედერალურმა საბჭომ შეზღუდვების მოხსნის სამეტაპიანი გეგმა წარადგინა.

პირველ ეტაპზე შეზღუდვები მოეხსნებათ: სალონებს, წვრილმანების მაღაზიებს, ყვავილების მაღაზიებს, ასევე, ექიმებს ექნებათ საშუალება ის სამედიცინო პროცედურები შეასრულონ, რომელიც კორონავირუსის გამო გადაიდო.

ყველა მაღაზია და ბიზნესი ვალდებულია, რომ ჰიგიენის ნორმებისა და სოციალური დისტანციის დაცვა უზრუნველყონ.

მიუხედავად იმისა, რომ შვეიცარიაში ნიღბების ტარება სავალდებულო არაა, დღეიდან გაყიდვაში 1 მილიონი პირბადე ჩაეშვება.

ბოლო მონაცემებით, შვეიცარიაში კორონავირუსის 29 061 დადასტურებული შემთხვევაა, მათ შორის გარდაცვლილია 1 610 და გამოჯანმრთელებულია 21 800 ადამიანი.