74 წლის ქალი, რომლის გარდაცვალებაზეც ეკვადორის საავადმყოფომ ოჯახს გასულ თვეში შეატყობინა, ცოცხალი აღმოჩნდა. BBC-ის ცნობით, შეცდომა საავადმყოფოს თანამშრომლებმა დაუშვეს და ოჯახს სხვა ადამიანის ფერფლი გაუგზავნეს.

პაციენტი, გვარად მარური, საავადმყოფოში გასულ თვეში მაღალი სიცხისა და სუნთქვის გართულებების გამო გადაიყვანეს. 27 მარტს ოჯახს გააგებინეს, რომ ის გარდაიცვალა, თუმცა კორონავირუსის გავრცელების თავიდან ასარიდებლად, მორგში მნახველების შესვლა აკრძალული იყო და გარდაცვლილი ოჯახის წევრს დისტანციიდან აჩვენეს, რომელმაც "მსგავსი თმისა და კანის ფერის გამო" ის არასწორად ამოიცნო.

3-კვირიანი კომის შემდეგ პაციენტმა გამოიღვიძა და ექიმებს სთხოვა, მისი დისთვის დაერეკათ. სიახლე ოჯახისთვის მოულოდნელი და სასიხარულო აღმოჩნდა, მაგრამ მათ არ იციან, ვისი ფერფლი აქვთ სახლში. ახლა ნათესავები კომპენსაციასა და კრემაციის ხარჯების დაბრუნებას ითხოვენ.

საავადმყოფომ ბოდიში მოიხადა და შეცდომის მიზეზად პანდემიის გამო არსებული გადატვირთვა დაასახელა. შემთხვევა სწორედ კორონავირუსის გავრცელების ეპიცენტრში მოხდა.