ფერმერები ითხოვენ, რომ საგანგებო მდგომარეობის პირობებში დაწესებული შეზღუდვები შერბილდეს, რათა მათ აგრო-სასურსათო პროდუქციის წარმოება შეძლონ. ფერმერების ერთიანი წერილი პრემიერმინისტრს, გარემოს დაცვისა და სოფლის მეურნეობის სამინისტროს, პარლამენტის აგრარული კომიტეტის თავმჯდომარესა და ბიზნესომბუდსმენს გაეგზავნა.

წერილში ფერმერები ითხოვენ, რომ ავტომანქანებით გადაადგილების დრო რამდენიმე საათით გახანგრძლივდეს. ამასთან, მათთვის სპეციალური ცხელი ხაზი შეიქმნას, რომელიც გადაადგილებისთვის საშვის გაცემას სწრაფად უზრუნველყოფს. გარდა ამისა, იმ 4 დიდ ქალაქში, სადაც შესვლა-გასვლა შეზღუდულია, ფერმერებისთვის, რომლებსაც უწევთ ამ ქალაქებში გადაადგილება, დაჩქარებული საშვები გაიცეს.

როგორც წერილში ფერმერები აღნიშნავენ, საგაზაფხულო სამუშაოების ჩატარება აუცილებელია, რათა ქვეყანაში აგრარული კულტურების წარმოება იყოს შესაძლებელი. მათივე თქმით, ეს პერიოდი ახლა დგას და 2-3 კვირაში დასრულდება.

"კარგად გვესმის, რომ კორონავირუსის პანდემია საფრთხეს უქმნის ადამიანთა ჯანმრთელობას, რომელიც ნომერ პირველი პრიორიტეტია ყველა ჩვენგანისათვის. ასევე, ვაფასებთ იმ ძალისხმევას რაც საქართველოს მთავრობამ გასწია, რათა ვირუსის გავრცელების დაბალი მაჩვენებელი გვქონოდა ქვეყანაში. თუმცა, მოგეხსენებათ, რომ სოფლის მეურნეობის გაჩერებამ შეიძლება მიგვიყვანოს მეორე საფრთხის წინაშე, რასაც სურსათის დეფიციტი და სიღარიბის ზრდა ჰქვია", — ნათქვამია განცხადებაში.

ფერმერები ამბობენ, რომ გადაადგილებაზე გამონაკლისის დაშვებით მოხარული არიან, თუმცა გარკვეული გამოწვევები მათ წინაშე კვლავ არსებობს:

  • ავტომანქანით ფერმერისა და მუშახელის გადაადგილებისთვის საშვების გაცემა გართულებულია;
  • ავტომანქანით გადაადგილების დრო (06:00-08:00 და 18:00-19:00 საათებში) და აგროსაშუალებების მაღაზიისა და მექანიზაციის ცენტრების მომსახურების საათები არ ემთხვევა ერთმანეთს;
  • შორ დისტანციაზე გადაადგილება ვისაც უწევს, მისთვის დილით 2 საათი და საღამოს 1 საათი არ არის საკმარისი, რომ წავიდეს ფერმაზე, ჩაატაროს აგრო-ღონისძიებები და დაბრუნდეს უკან სახლში.

ფერმერების პრობმლემებზე ისაუბრა დღეს გარემოს დაცვისა და სოფლის მეურნეობის მინისტრმა, ლევან დავითაშვილმა. მისივე თქმით, გადაადგილებისთვის გამოყოფილი დრო საგაზაფხულო სამუშაოების ჩატარებისთვის სრულად საკმარისია. გარდა ამისა, მან აღნიშნა, რომ მსგავსი გადაწყვეტილებები აუცილებლობიდან გამომდინარეობს და მან საზოგადოებას სოლიდარობისკენ მოუწოდა.