მართლია, ბოლო წლების ერთ-ერთი ყველაზე გახმაურებული სატელევიზო შოუს Westworld მესამე სეზონი ჯერ კიდევ არ დასრულებულა, თუმცა ერთგულ მაყურებლებს უკვე შეუძლიათ მშვიდად იყვნენ: HBO მეოთხე სეზონზე მუშაობას აგრძელებს.

"ვესტერნის თემატური პარკიდან უახლოესი მომავლის ტექნოკრატიულ ქალაქამდე ყველა დეტალით ვისიამოვნეთ, რაც სცენარისტების, ნამდვილი ამბის თხრობის ოსტატების — ლიზა ჯოისა და ჯონათან ნოლანის გონებაში გაჩნდა. შესაბამისად, ერთი სული გვაქვს გავიგოთ, თუ შემდეგში სად გვამოგზაურებს მათი შემოქმედებითი ხედვა", — განაცხადა HBO-ს წარმომადგენელმა.

სერიალის მესამე სეზონის პრემიერა 15 მარტს შედგა და ის საკმაოდ წარმატებული აღმოჩნდა: ცხრა მილიონზე მეტი მაყურებელი ჰყავდა. ახალ სეზონში სულ რვა ეპიზოდია და მისი ფინალი 3 მაისსაა დაგეგმილი.

Westworld-ის ამჟამად მიმდინარე სეზონში სიუჟეტი თემატური პარკის გარეთ ვითარდება, სადაც ნაცნობ მსახიობებთან ერთად (ევან რეიჩელ ვუდი, თენდი ნიუტონი თუ ჯეფრი რაითი) ახალი სახეებიც ვიხილეთ — ტესა თომპსონი, აარონ პოლი და ვინსენტ კასელი.

HBO-ს ამ ერთ-ერთი ყველაზე პოპულარული სატელევიზიო შოუს პრემიერა 2016 წელს შედგა და ის 1973 წელს გამოსული ამავე სახელწოდების მქონე ფილმის მიხედვით გადაიღეს.