მოსკოვში პნევმონიის ნიშნებით საავადმყოფოში გადაყვანილი ქალი გამოწერის შემდეგ თავისი სახლს სადარბაზოსთან, სკამზე გარდაიცვალა. ტვ რეინის ინფორმაციით, ჯანდაცვის უწყებამ შიდა გამოძიება უკვე დაიწყო.

19 აპრილს REN-მა გამოაქვეყნა სათვალთვალო კამერების გადაღებული ვიდეო, რომელშიც ჩანს, რომ ქალი სახლში სოციალურმა ტაქსიმ მიიყვანა, ის შეუძლოდ გახდა და სკამზე წამოწვა. ტელეკომპანიის მტკიცებით, სოციალურმა ტაქსიმ ქალი მიატოვა, სასწრაფო კი მეზობლებმა გამოიძახეს.

ჯანდაცვის დეპარტამენტის განცხადებით, ქალი პნევმონიის ნიშნებით საავადმყოფოში 17 აპრილს შეიყვანეს. მათივე თქმით, ქალს ანალიზი გაუკეთეს და ფილტვებზე ტომოგრაფია გადაუღეს. უწყებაში აღნიშნავენ, რომ ქალს კორონავირუსი არ აღმოაჩნდა, ამიტომ მეორე დღეს გაწერეს და ექიმის გამოძახება სახლში ურჩიეს.

გარდა ამისა, დეპარტამენტის ინფორმაციით, პაციენტი სახლამდე სოციალურმა ტაქსიმ მიიყვანა, სადარბაზოსთან კი მას სოციალური მუშაკები დახვდნენ. უწყებაში ამბობენ, რომ მას შემდეგ, რაც ქალი ცუდად გახდა, სასწრაფო სოციალურმა მუშაკებმა გამოიძახეს და სახლიდან ეზოში ჩასვლა ქალის შვილს სთხოვეს. დეპარტამენტის მტკიცებით, გაკვეთის შედეგის მიხედვით, ქალი გულის შეტევით გარდაიცვალა.