Ekhokavkaza-ს ცნობით, უმაღლესი რადის დეპუტატმა ოპოზიციური ბლოკიდან, ვადიმ რაბინოვიჩმა, უკრაინის შინაგან საქმეთა სამინისტროს, გენპროკურატურასა და ქვეყნის პრეზიდენტს მიმართა წინადადებით, რომ განიხილონ მიხეილ სააკაშვილის საქართველოში გაძევების საკითხი. ამის შესახებ პარლამენტარმა ტელეკომპანია 1+1-ის ეთერში განაცხადა.

რაბინოვიჩმა ასევე განმარტა, რომ სააკაშვილისთვის უკრაინის მოქალაქეობის მინიჭების პროცედურა კანონთან შეუსაბამო იყო და სწორედ ამიტომ, საჭიროა, რომ მას ეს მოქალაქეობა ჩამოართვან:

"გარდა ამისა, ჩვენ საქართველოსთან საერთაშორისო დამნაშავეების გადაცემასთან დაკავშირებით შეთანხმება გვაქვს. მოდით, ნუ დავარღვევთ მას, საქართველოსთან ერთი პირის გამო კონფლიქტი ნუ გვექნება".

როგორც საქართველოს საგარეო საქმეთა მინისტრმა, გიორგი მღებრიშვილმა რამდენიმე დღი წინ განაცხადა, ქვეყნის ექსპრეზიდენტს მაშინვე დააკავებენ, როგორც კი ის საქართველოს საზღვარს გადმოკვეთს.

7 ნოემბერს ოდესის გუბერნატორი, მიხეილ სააკაშვილი თანამდებობიდან გადადგა. ამის შესახებ მან საგანგებო ბრიფინგზე განაცხადა და აღნიშნა, რომ უკრაინის კორუფციისგან გათავისუფლებისთვის ბრძოლას ისევ გააგრძელებს. 11 ნოემბერს ოპოზიციაში გადასულმა სააკაშვილმა განაცხადა, რომ ახალ პარტიას ქმნის და ვადამდელ არჩევნებს ითხოვს.