პრემიერ-მინისტრის, გიორგი გახარიას განცხადებით, წლის ბოლომდე საერთაშორისო დახმარების სახით 3 მილიარდი აშშ დოლარი იქნება ხელმისაწვდომი. ამის შესახებ გახარიამ საკოორდინაციო საბჭოს სხდომაზე ისაუბრა.

"დონორებთან მუშაობის შედეგად, ქვეყნის ბიუჯეტს და ეკონომიკას, სახელმწიფოს ნაწილში წლის ბოლომდე ექნება 1,5 მილიარდი აშშ დოლარის დახმარება, ისევე, როგორც დონორებმა გამოთქვეს მზადყოფნა, რომ იგივე ოდენობის რესურსი ხელმისაწვდომი იყოს ჩვენი კომერციული საბანკო სექტორისთვის", — განაცხადა პრემიერმა.

მისივე თქმით, ის სასტარტო პირობები, რომლებიც 2020 წლის დასაწყისში გვქონდა 1,5-2 წლის განმავლობაში უნდა აღვადგინოთ.

პრემიერ-მინისტრის განცხადებით, ამავდროულად აუცილებელია მსჯელობა პოსტკრიზისულ პერიოდში მოქალაქეების, ბიზნესისა და ეკონომიკის მიზნობრივ დახმარებაზე. ის მიიჩნევს, რომ ეპიდემიასთან ბრძოლის ეფექტურობა შეზღუდვებიდან გამოსვლასა და ეკონომიკის აღდგენის ეტაპზე გადასვლასთან პირდაპირ კავშირშია.