ევროკავშირის ელჩი საქართველოში, კარლ ჰარცელი ამბობს, რომ თავდაცვის ყოფილი მინისტრის, ირაკლი ოქრუაშვილის საქმის განაჩენი პოლიტიკური პოლარიზაციის გაზრდის რისკებს შეიცავს. ამის შესახებ მან ევროკავშირის ქვეყნის ელჩებთან შეხვედრის შემდეგ განაცხადა.

"ირაკლი ოქრუაშვილის საქმის გარემოებები ხელს არ უწყობს ნდობის მშენებლობას იმ ისტორიული პოლიტიკური შეთანხმების გარშემო, რომელსაც ყველა ძირითადმა პოლიტიკურმა პარტიამ მიაღწია 8 მარტს და აღძრავს კითხვებს 2019 წლის 20 ივნისის მოვლენების შემდგომი ქმედებების მიუკერძოებლობასთან დაკავშირებით [...] მოვუწოდებთ ყველა მხარეს 8 მარტის შეთანხმების ერთგული დარჩეს", — განაცხადა ჰარცელმა.

ოქრუაშვილის საქმის განაჩენს გამოეხმაურა აშშ-ს საელჩოც:

"ირაკლი ოქრუაშვილის დაპატიმრების დრომ და გარემოებამ გამოიწვია შეშფოთება პოლიტიკურ ჩარევასა და შერჩევითი სამართლის გამოყენებასთან დაკავშირებით. ეს საქმე ჩრდილს აყენებს სამართალწარმოების მიუკერძოებლობას — საკითხს, რომლის ირგვლივ არსებული შეშფოთების გაქარწყლებას ემსახურებოდა 8 მარტის ერთობლივი განცხადება".

13 აპრილს თბილისის საქალაქო სასამართლომ 20 ივნისის საქმეზე ბრალდებულ ირაკლი ოქრუაშვილის 5 წლით თავისუფლების აღკვეთა მიუსაჯა. სასამართლომ ოქრუაშვილი ძალადობის ორგანიზების ნაწილში გაამართლა, ხოლო მონაწილეობის განხრით გაამტყუნა. 20 ივნისის საქმეზე ამ დრომდე 20-მდე პირია პასუხისგებაში მიცემული, მათ შორისა ნაციონალური მოძრაობის ერთ-ერთი ლიდერი ნიკა მელიაც, რომელიც განაჩენს ელოდება.