დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ქართული ოცნების დეპუტატის, ირაკლი კობახიძის თქმით, ბზობას არაერთ ადგილად დაირღვა საგანგებო რეჟიმის დროს დაწესებული ზომები. რაც მიუღებელია. მისივე თქმით, ხელისუფლებას შესაბამისი რეაგირება ექნება. ამის შესახებ მან რუსთავი 2-თან ისაუბრა.

"რაც შეეხება მომდევნო დღეების განმავლობაში იმას, თუ როგორ უნდა წარიმართოს პროცესი ამასთან დაკავშირებით გვექნება კონსულტაციები. ჩვენ ვართ ხელისუფლება და აქაც ჩვენი პასუხისმგებლობაა ყველას მოვუსმინოთ და მოსმენის შემდეგ უნდა მივიღოთ ისეთი გადაწყვეტილება, რომელიც ყველაზე მეტად წაადგება ჩვენს ქვეყანასა და ვითარებას", — აღნიშნა კობახიძემ.

მან კიდევ ერთხელ გაიმეორა, რომ სადაც საგანგებო რეჟიმის დროს დაწესებული შეზღუდვები დაირღვევა, იქ შესაბამისი რეაგირება იქნება.

კორონავირუსის გამო საქართველოში საგანგებო რეჟიმი და ე.წ. კომენდანტის საათი მოქმედებს. მიუხედავად შეზღუდვებისა საქართველოს მართლმადიდებელი ეკლესია ღვთისმსახურებას მრევლის თანდასწრებით ატარებს. 12 აპრილს ბზობის დღესასწაულზე ტაძრების ნაწილში საპატრიარქოს მიერ დაპირებული დისტანცია დაცული არ იყო.

გარდა ამისა, ცნობილი გახდა, რომ სააღდგომო ღვთისმსახურებას 19 აპრილს კომენდანტის საათის დროს ჩაატარებს. თუმცა როგორ შეიკრიბება მრევლი ეკლესიაში საპატრიარქოს ჯერ არ განუმარტავს.

საქართველოში კორონავირუსით ინფიცირების 266 შემთხვევაა დაფიქსირებული. ინფიცირებულთა შორის 67 პაციენტი გამოჯანმრთელებულია, ხოლო 3 გარდაცვლილი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: