სხვა უამრავი სამუშაო სივრცის მსგავსად, სატელევიზიო სექტორსაც შექმნილ მდგომარეობასთან ადაპტირება დასჭირდება და მათ შორის გამონაკლისი არც ერთ-ერთი ყველაზე ცნობილი ამერიკული კომედიური გადაცემა Saturday Night Live-ია, რომელმაც სულ ცოტა ხნის წინ ახალი გადაცემა დისტანციურად ჩაწერა.

უჩვეულო ფორმატთან ერთად ეს გადაცემა იმითაც იყო გამორჩეული, რომ მას არც მეტი, არც ნაკლები ტომ ჰენკსმა უმანსპინძლა.

შეგახსენებთ, რომ ტომ ჰენკსი ერთ-ერთი პირველი ვარსკვლავი იყო, რომელსაც კორონავირუსი დაუდგინდა.

Saturday Night Live-ის ახალ გადაცემაში მონაწილეობის მიღებით ის სწორედ ამ დიაგნოზის დასმის შემდეგ პირველად გამოჩნდა საჯაროდ.

"მას შემდეგ, რაც ეს დიაგნოზი დამიდგინდა, ისე, როგორც არასდროს, თავს ამერიკის მამად ვგრძნობდი: ჩემ გვერდით ყოფნა არავის უნდოდა და ყველას დისკომფორტს ვუქმნიდი", — იხუმრა მსახიობმა თავის მონოლოგში.

ჰოლივუდის ამ ერთ-ერთი ყველაზე ცნობილი და გავლენიანი მსახიობის განცხადებით, ის და თავისი ცოლი, რიტა უილსონი ამჟამად თავს უკვე კარგად გრძნობენ:

"მე და ჩემი ცოლი თავს უკვე შესანიშნავად ვგრძნობთ და იზოლაციაში ვართ, როგორც ჩვენ ყველა უნდა ვიყოთ ახლა. თუმცა ფაქტია, რომ მუდმივად სპორტულ შარვალში გამოწყობილს კოსტიუმი 11 მარტის შემდეგ პირველად მაცვია. ჩემი ცოლი დამეხმარა ჩაცმაში, რადგან დამავიწყდა, როგორ უნდა გამეკეთებინა ეს".

ტომ ჰენკსი ხუმრობებთან ერთად ცდილობდა ბალანსი სიტუაციის შესაბამისად სერიოზულ თემებზე საუბრითაც დაეცვა:

"ამ ყველაფერს ერთად გადავიტანთ და მადლობას გადავუხდით სამედიცინო პერსონალს და ყველას, ვინც ასე გვეხმარება: სუპერმარკეტის თანამშრომლები; კურიერები, რომლებსაც ჩვენთვის საჭმელი მოაქვთ; ადამიანები, რომლებიც სხვების დასახმარებლად თავიანთ ხელფასებს იქვითავენ; ქალები და კაცები, რომლებიც ამ ქვეყანას კვლავ სიცოცხლის გაგრძელებაში ეხმარებიან მაშინ, როცა ეს ყველაზე მეტად გვჭირდება. ჩვენ ვიზრუნებთ მათზე და ასევე ერთმანეთზე, ახლა კი ამ შოუთი ისიამოვნეთ".