ამერიკულმა ჟურნალმა TIME-მა ახალი ნომერი სამედიცინო პერსონალს მიუძღვნა — მათ, ვინც კორონავირუსის პანდემიის დროს ჯანმრთელობის რისკად თავს არ ზოგავენ და პაციენტებს ეხმარებიან.

გამოცემის რედაქტორების თქმით, ყოველკვირეულად უწევთ იმაზე ფიქრი, თუ რომელი ინდუსტრიის ვარსკვლავს დაუთმონ ჟურნალის ყდა, თუმცა ამჯერად გადაწყვეტილება მარტივი და ერთსულოვანი იყო.

ახალ ნომერი მთლიანად ექიმების გამოცდილებებს ეძღვნება. ჟურნალის მკითხველი COVID-19-თან ბრძოლის წინა ხაზზე მყოფების ისტორიებს გაეცნობა.

"ჩვენ შევარჩიეთ ხუთი მამაცი წარმომადგენელი სხვადასხვა ადგილებიდან. აქ წაიკითხავთ მათივე სიტყვებით მოთხრობილ ისტორიებს, ილუსტრირებული ნაწილი კი მაქსიმალურად დაეთმობა იმ სურათებს, რომლებიც თავად გამოგვიგზავნეს. დღეს ისინი ყველაზე გავლენიანი ადამიანები არიან", — წერს TIME-ის მთავარი რედაქტორი ედვარდ ფელსენტალი.

თვითიზოლაციის პირობებში დახურულია TIME-ის ოფისიც, ჟურნალისტები კი დისტანციურად მუშაობენ სხვადასხვა თემაზე. ჟურნალის ონლაინ განყოფილებაში კი ფრონტის ხაზის გმირების ვიდეოებსაც ნახავთ.